चितवन । पूर्व प्रधानमन्त्री नेकपा (माओवादी केन्द्र) का अध्यक्ष पुष्पकमल दाहाल प्रचण्डले नारायणगढको क्याम्पाचौरमा मिनी स्टेडियम बनाउन सहयोग गर्ने प्रतिवद्धता जनाउनुभएको छ । (मंगलबार)देखि क्याम्पाचौरमा सुरु भएको १३ औं टुवोर्ग विकाश रनिङ शिल्ड फुटबल प्रतियोगिताको समुद्घाटन गर्दै प्रचण्डले क्याम्पाचौरमा स्टेडीयमको आवश्यकता रहेको महसुस गर्दै यसका लागि सहयोग गर्ने प्रतिवद्धता जनाउनुभयो ।
उहाँले मिनी स्टेडियम बनाउन असम्भव नरहेको भन्दै सबै मिलेर अघि बढे स्टेडीयम बन्न सहज हुने बताउनुभयो । उहाँले चितवनको खेल क्षेत्रको विकासका लागि नै पश्चिम चितवनमा रंगशाला निर्माणको लागि आफ्नो पहलमा ६० करोड रुपैयाँ विनियोजन गरिएको स्मरण गराउनुभयो ।
उहाँले चितवनमा औद्योगिक क्षेत्र, प्रदर्शनी केन्द्रदेखि अब खेलकुद क्षेत्रलाई पनि आफूले प्राथमिकतामा राखेको बताउनुभयो । अध्यक्ष प्रचण्डले नेपालको खेलकुद क्षेत्रले देशलाई चिनाउन मद्धत पुगेको भन्दै खेल क्षेत्रको विकास आवश्यक रहेको बताउनुभयो ।
उहाँले खेलकुदले युवा वर्गको स्वास्थ्य स्वस्थ राख्न मात्र नभई राष्ट्रलाई एकता गराउने काम गर्ने गरेको बताउनुभयो । कार्यक्रममा विकाश शिल्डका अध्यक्ष श्याम पियाले विभिन्न कारणले स्थगित हुँदै आएको प्रतियोगितालाई फेरी निरन्तरता दिन सहयोगको खाँचो रहेको बताउनुभयो ।
उहाँले अध्यक्ष प्रचण्डलाई क्याम्पाचौरमा मिनी स्टेडियम निर्माणका लागि सहयोग गरिदिन आग्रह गर्नुभयो ।
प्रकाशित मिति: सोमबार, फागुन ७, २०७४
