चितवन । नेकपा माओवादी केन्द्रका अध्यक्ष पुष्पकमल दाहालले स्थानीय स्तरमा हुने खेलकुदले संघीयता स्थापना गर्नमा महत्वपूर्ण भूमिका खेल्ने बताउनुभएको छ । चितवनको भरतपुरमा सुरु भएको तेस्रो इन्डो–नेपाल मुवाँथाई तथा चौथो राष्ट्रिय मुवाँथाई एवम् वृहत तेकवान्दो प्रतियोगिताको आइतबार उद्घाटन गर्दै दाहालले खेलकुदको अन्तर्राष्ट्रिय स्तरमा आकर्षण बढ्दै गएकोले बताउनुभएको छ ।
नेपालमा भरखरै सम्पन्न भएको सम्पन्न भएको स्थानीय तह, प्रदेश र संघको निर्वाच सम्पन्न भएर प्रादेशिक रुपमा खेलकुद आयोजना गर्ने क्रमले युवाहरुलाई स्वास्थ्यको निम्ती खेलकुद, राष्ट्रका निम्ती खेलकुद भन्ने नारामा समेट्न सक्ने दाहालको भनाइ थियो ।
सोमबारसम्म सञ्चालन हुने प्रतियोगिता अन्गर्तत इन्डो–नेपाल मुवाँथाई प्रतियोगितामा नेपाल र भारतका १२ जना खेलाडी सहभागी रहेका नेपाल राष्ट्रिय मुवाँथाई संघका अध्यक्ष गणेशलाल कोलाक्षपतीले जानकारी दिनुभयो । प्रतियोगिता ५० किलो, ५६ किलो, ६० किलो, ७० किलो, ८१ किलो र ९८ किलो तौल समूहमा प्रतिस्पर्धा हुनेछ । आइतबार भएको उद्घाटन खेलमा ६० किलो तौल समूहमा नेपाली सेनाका गुणराज रुचालले भारतका प्रेन कटनलाई पराजित गर्दै मेडल हात परेका छन् ।
त्यस्तै, चौथो राष्ट्रिय मुवाँथाई अन्तर्गत ३६ जना खेलाडी सहभागी रहेका छन् । महिला तर्फ ५५ देखि ६० किलो तौल समूहमा चार जना प्रतिस्पर्धा गर्दैछन् भने पुरुष तर्फ ५५ किलोसम्म, ६० किलोसम्म, ६५ किलोसम्म र ७५ किलोसम्मको तौल समूहमा प्रतिस्पर्धा गराइने अल मार्सल आर्ट एकेडेमी भरतपुरका अध्यक्ष उत्तम गुरुङले बताउनुभयो ।
त्यस्तै, आइतबार प्रतियोगिता उद्घाटनका क्रममा खेलकुदको विकासमा महत्वपूर्ण योगदान पु¥याएको भन्दै अल मार्सल आर्ट एकेडेमीले जिल्ला खेलकुद विकास समितिका प्रमुख रामजी ढकाल, एथलेटिक्स प्रशिक्षक कान्ती महतो, भलिबल प्रशिक्षक उमादेवी गुरुङलगायतलाई सम्मान गरिएको छ । उनीहरुलाई पूर्वप्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहालले सम्मान गर्नुभएको हो ।
प्रकाशित मिति: शनिबार, माघ २७, २०७४
