काठमाडौं । आईसीसी विश्व क्रिकेट लिग डिभिजन टूको पहिलो खेलमा नेपालले नामिवियामाथि संघर्षपूर्ण जित दर्ता गरेको छ । नेपालले नामिवियाले दिएको १३९ रनको लक्ष्य ४ वल बाँकी छँदा पूरा गर्यो ।
१३९ रनको लक्ष्य पछ्याएको नेपालको सुरुवात खराब रहृयो । टिमले खाता नै खोल्न नपाउँदै ओपनर दिलिपनाथ आउट भए । उपकप्तान ज्ञानेन्द्र मल्लसँग ३२ रनको साझेदारी गर्दै कप्तान पारस खड्का व्यक्तिगत १९ रनमा आउट भए ।
लगतै आरिफ शेख शुन्यमै आउट भए । पाँचौं नम्बरमा शरद भेषावकरले ६७ बल खेल्दै २९ रन जोडे । ज्ञानेन्द्र व्यक्तगत १५ रनमा आउट हुन पुगे । दिपेन्द्र सिंह ऐरी ६ रनमा आउट हुँदा करण केसीले ३ रन मा त्र जोडे । रोहितकुमार पौडेलले शरदलाई साथ दिने सातौं विकेटका लागि ३७ रनको साझेदारी गरे । उनले व्यक्तिगत रूपमा १७ रन जोडे ।
बसन्त रेग्मी र सोमपाल कामीले पारी सम्हाल्ने प्रयास गरे । तर, नवौं विकेटका लागि मात्र १७ रनको सझेदारी गरेका सोमपाल ४७ औं ओभरमा बोल्ड भए ।
त्यसबेला नेपाललाई २० बलमा १८ रन चाहिएको थियो । ४८ ओभरमा नेपालले २ रन मात्र जोड्यो भने अर्को ओभरमा बसन्तले छक्का हानेपछि नेपाललाई केही राहत मिल्यो ।
अब अन्तिम ६ बलमा ७ रन चाहियो । अन्तिम ओभरको दोस्रो बलमा २ रन लिएको नेपालका लागि चौथो बलमा बसन्तले चौका हाने । अर्को बल बाइड भएपछि नेपालले रोमाञ्चक जित निकाल्यो ।
यसअघि टस हारेर ब्याटिङको निम्तो पाएको घरेलु टोलीको पनि सुरुवात राम्रो गर्न सकेन् । नेपाली बलरहरुले ३४.२ ओभरमा १३८ रन दिँदै प्याकअप गरिदिए ।
नामिवियाका लागि एउटा इन्डबाट क्रेग विलियम्सले सर्वाधिक ४१ रन बनाए । उनले जेपी कोट्जेसँग मिलेर तेस्रो विकेटका लागि ५२ रनको साझेदारी गरेका थिए । ग्रिन र जान फ्राइलिंकले समान २२ रन जोडे ।
नामिबियालाई सस्तैमा समेट्ने क्रममा सन्दिप लामिछाने एक्लैले चार विकेट लिए । ८.२ ओभर बलिङ गरेका उनले दुई मेडन राख्दै मात्र १८ रन दिएका थिए । सोमपाल कामीले ३ विकेट लिए भने बसन्त रेग्मी, पारस खड्का र शरद रेग्मीले १-१ विकेट आफ्नो नाममा लेखाए ।
खेलमा सन्दीप लामिछाने म्यान अफ दि म्याच भएका छन् ।
प्रकाशित मिति: बुधबार, माघ २४, २०७४
