बैतडी । जिल्लामा सम्पन्न मेयर कप टि–ट्वान्टी क्रिकेट प्रतियोगिताको उपाधि दशरथचन्द नगरपालिका–४, खलंगाले हात पारेको छ ।
बुड्डा बाजे क्रिकेट मैदान, रातामाटामा बिहीबार भएको उपाधि भिडन्तमा दशरथचन्द नगरपालिका–२, देहिमाडौँलाई ६ विकेटले पराजित गरेको हो । योसँगै खलंगाले नगद रु ५० हजार पुरस्कार प्राप्त परेको छ भने उपविजेता देहिमाण्डौँले ३० हजारमा चित्त बुझाएको छ ।
टस हारेर ब्याटिङ्को निम्ता पाएको देहिमाण्डौँ १९ दशमलव १ ओभरमा १३७ रन जोड्न सक्यो । गजेन्द्र बोहराले ३३, ऋषिकेश बोहराले २८ तथा खडक बोहराले २५ रनको योगदान गरे । खलंगाका प्रदीप चन्द र हरिश कार्कीले समान तीन-तीन विकेट हात पारे । १३८ रनको विजय लक्ष्यका साथ मैदानमा उत्रेको खलंगाले १८ दशमलव ३ ओभरमा ४ विकेटको क्षतिमा लक्ष्य भेट्टायो ।
म्यान अफ द फाइनल भएका सुरज बोहराले नटआउट ६६ रनको योगदान गरे । राजु भाटले २० तथा हरिश कार्कीले १७ रन बनाए । देहिमाण्डौँका ऋषिकेश बोहरा, गजेन्द्र बोहरा र सुरेन्द्र बोहराले समान एक-एक विकेट हात पारे ।
यसैबीच, प्रतियोगिताभर उत्कृष्ट प्रदर्शन गर्दै व्यक्तिगत ११४ रन तथा ७ विकेट हात पार्ने खलंगाका सुरज बोहरा म्यान अफ द सिरिजका साथै उत्कृष्ट ब्याट्सम्यान घोषित भएका छन् । सुरजले नगद रु पाँच हजार पुरस्कार पाएका छन् । यस्तै, प्रतियोगिताभर ९ विकेट हात पार्नुका साथै ७६ रन बनाएका देहिमाण्डौँका ऋषिकेश बोहरा उत्कृष्ट बलर भए ।
शहीद दिवशका अवसरमा दशरथचन्द नगरपालिकाको आयोजना र बैतडी जिल्ला क्रिकेट संघ, नगर क्रिकेट समितिको प्राविधिक सहयोगमा प्रतियोगिता सम्पन्न भएको हो ।
प्रकाशित मिति: बिहीबार, माघ ११, २०७४
