काठमाडौं । रुपन्देहीको भैरहवा कारागारमा रहेका राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछानेलाई ललितपुरको नक्खु कारागारमा स्थानान्तरण गर्ने निर्णय भएको छ।
गृह मन्त्रालय स्रोतका अनुसार, कारागार व्यवस्थापन विभागका नयाँ महानिर्देशक लीलाप्रसाद शर्माले पदभार सम्हालेको दिनमै लामिछानेको सरुवाको निर्णय गरेका हुन्। लामो समयदेखि रोकिएको सरुवाको प्रक्रिया आज अन्ततः टुंगिएको हो। अब रुपन्देही कारागारले आवश्यक कागजी प्रक्रिया पूरा गरेपछि उनलाई नक्खु कारागार पठाइनेछ।
स्रोतका अनुसार, लामिछानेले यसअघि नै अदालत र जिल्ला प्रशासन कार्यालयमार्फत सरुवाको अनुमति प्राप्त गरेका थिए। तर, गृहमन्त्री रमेश लेखकको निर्देशनमा प्रक्रिया रोकिन पुगेको भन्दै आलोचना हुँदै आएको थियो। राष्ट्रिय मानव अधिकार आयोगले समेत गत साता कारागार निरीक्षणपछि प्रक्रिया पूरा भएर पनि सरुवा नगरेको विषयमा ध्यानाकर्षण गराएको थियो।
कारागार सरुवाका कारणहरूमा बिरामी अवस्था, अदालतको आदेश, सुरक्षा कारण वा कैदीकै माग पर्दछन्। लामिछानेको सरुवा घरपायक कारणले भएको विभागले जनाएको छ।
रवि लामिछाने हाल बुटवलस्थित सुप्रिम सहकारीको रकम ठगीको अभियोगमा पुर्पक्षका क्रममा भैरहवा कारागारमा छन्। जिल्ला अदालतले १ करोड रुपैयाँ धरौटीमा रिहा गरे पनि उच्च र सर्वोच्च अदालतले थुनामै बस्नुपर्ने आदेश दिएका छन्। उनले हालै आफ्नो भागको बिगो बुझाएर रिहाइको माग गरे पनि जिल्ला अदालतले अस्वीकार गरिसकेको छ।
उनका विरुद्ध काठमाडौँ, कास्की, चितवन र पर्सा जिल्ला अदालतमा सहकारी ठगीका मुद्दा दर्ता छन्। साथै, कास्कीमा सम्पत्ति शुद्धीकरणको अभियोग पनि लागेकाले उनको सांसद पद निलम्बनमा छ।
प्रकाशित मिति: शुक्रबार, साउन ३१, २०८२
