काठमाडौं । रवि लामिछानेका राजनीतिक यात्रा र पार्टी स्थापनाकालका अघोषित शक्तिशाली सहयोगी, पूर्व केन्द्रीय सदस्य मोहन थापा अमेरिकाबाट डिपोर्ट भएका छन्! केही दिनअघि मात्र अमेरिकाले उनलाई काठमाडौं पठाइदिएको अध्यागमन विभागका स्रोतले पुष्टि गरेका छन्। फागुन महिनामा अमेरिकाको फिलाडेल्फिया विमानस्थलमा झरेको केही मिनेटमै अमेरिकी इमिग्रेशन एजेन्सीले उनलाई पक्राउ गरेको थियो।
थापामाथि अमेरिकामा बस्दै गर्दा फर्जी चालक अनुमतिपत्र प्रयोग, ठगी र मेलमार्फत र्याकिटियरिङ जस्ता गम्भीर मुद्दामा फेडरल अदालतमा दोष स्वीकारेको तथ्य बाहिर आइसकेको छ। बाल्टिमोरस्थित ‘बाल्टिमोर एशोसिएसन अफ नेप्लिज इन अमेरिका’ (BANA) का संस्थापक अध्यक्ष रहेका उनी लामिछानेको पार्टीलाई आवश्यक पर्ने पैसादेखि प्रचार–प्रसारसम्मको व्यवस्थापन गर्ने मुख्य आर्थिक स्रोत मानिन्छन्।
रवि लामिछाने गृहमन्त्री हुँदा उनी अमेरिकाबाटै गृहमन्त्रालयभित्रका संवेदनशील सरुवा-बढुवा प्रक्रियामा समेत सक्रिय रहेको भन्ने गम्भीर आरोप पटक–पटक सतहमा आएको थियो। यही नजिकको सम्बन्धकै कारण उनलाई पार्टीभित्र ‘रविको हाउसब्वाई’ भनेर समेत चिनिन्थ्यो।
गिरफ्तारीपछि रास्वपाले उनलाई पार्टी जिम्मेवारीबाट हटाउँदै वेबसाइटबाट समेत नाम हटाइसकेको छ। डिपोर्ट भएर फर्किएका थापा अहिले काठमाडौंमै रहेको बुझिएको छ। अमेरिकाले भने डिपोर्टको आधिकारिक कारण खुलाएको छैन, तर स्रोतहरू भन्छन्— विगतका आपराधिक मुद्दा र आप्रवासन कानुन उल्लंघन नै उनको राजनीतिक करियरको यो ठूलो पतनको कारण बनेको हो।
प्रकाशित मिति: बिहीबार, साउन ३०, २०८२
