काठमाडौँ । प्रधानमन्त्री केपी शर्मा ओलीले प्रतिनिधिसभामा सम्बोधन गर्दै राष्ट्रिय स्वतन्त्र पार्टी (रास्वपा)का सभापति रवि लामिछाने र उनका पार्टी सांसदमाथि तीव्र प्रहार गरेका छन्।
हालै सम्पन्न तुर्कमेनिस्तान भ्रमणबारे जानकारी दिएपछि ओलीले सहकारी ठगी प्रकरणमा रुपन्देही कारागारमा रहेका लामिछानेमाथि सरकारको प्रतिशोध भएको भन्ने आरोपको कडा खण्डन गरे।
‘संसदमा सरकारले के काम गर्यो भन्ने प्रश्न उठोस् भन्ने चाहन्छु, तर केही गर्नेजस्तो होइन, बरु गालिगलौज र उत्तेजनालाई प्रेरित गर्ने काम भइरहेको छ,’ ओलीले भने, ‘देश र जनताको हितमा केन्द्रित बहसको साटो, सोसल मिडियाका लागि कन्टेन्ट उत्पादन गर्ने थलो बनाइएको छ।’
उनका अनुसार सहकारी ठगीमा संलग्न सयौँ व्यक्तिमाथि मुद्दा चलिरहेको छ, जसमा पूर्वमन्त्री, पूर्वसांसद् र बहालवाला मेयरसम्म अदालतको आदेशमा थुनामा छन्। ‘तर एउटामात्र व्यक्तिमाथि राजनीतिक प्रतिशोध भएको भाष्य बनाइन्छ। यदि त्यो प्रतिशोध हो भने अरू थुनामा रहेका दर्जनौँ व्यक्तिको के हो? त्यो कानुनी कारबाही हो?’ उनले प्रश्न गरे।
ओलीले लोकतान्त्रिक प्रणालीलाई ‘पेसेवर मास मेनिपुलेसन’ बाट जोगाउनुपर्ने आवश्यकता औंल्याउँदै केही व्यक्तिको विगतको प्रसंग पनि कोटे। ‘भिजिट भिसामा विदेश गएर उतैको नागरिकता लिएर मन्त्रीसम्म भएका, भिजिट भिसामै गएर उतै दुई-दुई पटक बिहे गर्नेले अन्तर्राष्ट्रिय विमानस्थलमा प्लेन चढ्ने नेपाली नागरिकलाई बेचिएको भन्ने?’ उनले व्यंग्य गरे।
ओलीले भीडको दबाबमा कानुनी प्रक्रिया तोड्ने प्रवृत्तिको आलोचना गर्दै, ‘भीडद्वारा न्यायको हत्या गरेर अभियोगमुक्त हुन खोज्नेहरूलाई समयले जवाफ माग्नेछ,’ चेतावनी दिए।
प्रकाशित मिति: बुधबार, साउन २९, २०८२
