काठमाडौं । प्रधानमन्त्री केपी शर्मा ओली आज प्रतिनिधि सभाको बैठकमा सम्बोधन गर्ने भएका छन्। संसद सचिवालयका अनुसार दिउँसो १ बजे बस्ने बैठकमा प्रधानमन्त्री ओलीले हालका समसामयिक विषयहरूबारे धारणा राख्ने कार्यक्रम तय भएको छ।
एमाले संसदीय दलका मुख्य सचेतक महेश बर्तौलाले दिएको जानकारीअनुसार प्रधानमन्त्रीको सम्बोधनमा हालै सम्पन्न तुर्केमेनिस्तान भ्रमणको अनुभव र उपलब्धिहरूका साथै देशको समसामयिक राजनीतिक तथा आर्थिक परिस्थितिसम्बन्धी विषय समावेश हुने छन्।
प्रधानमन्त्री ओली केही दिनअघि तुर्केमेनिस्तानको औपचारिक भ्रमण सकेर स्वदेश फर्केका हुन्। उक्त भ्रमणका क्रममा उनले विभिन्न द्विपक्षीय बैठकहरूमा भाग लिँदै पारस्परिक सहयोग, व्यापार, ऊर्जा र सांस्कृतिक आदान–प्रदानबारे छलफल गरेका थिए।
संसदको आजको बैठकमा प्रधानमन्त्रीको सम्बोधनपछि प्रतिपक्षी दलका सांसदहरूले पनि सरकारको नीति तथा कार्यशैलीबारे प्रश्न–उत्तर गर्ने अपेक्षा गरिएको छ।
प्रकाशित मिति: बुधबार, साउन २९, २०८२
