काठमाडौं — ‘कुलिङ अफ पिरियड’ सम्बन्धी गडबडीमा प्रत्यक्ष जिम्मेवार ठहर गरिएका प्रतिनिधिसभा राज्य व्यवस्था तथा सुशासन समितिका सभापति रामहरि खतिवडाले पदबाट राजीनामा दिने तयारी गरेका छन्।
छानबिनका क्रममा विशेष समितिले खतिवडा र समितिका सचिव सुरजकुमार दुरालाई नामसहित जिम्मेवार ठहर गरेको थियो। यसबारे प्रतिक्रिया दिन खतिवडाले मंगलबारको प्रतिनिधिसभा बैठकमा बोल्नका लागि सभामुखसँग समय मागेका छन्। बैठकअघि उनले सभामुख देवराज घिमिरे र कांग्रेसका प्रमुख सचेतक श्याम घिमिरेसँग भेटवार्ता गरेका थिए।
विशेष छानबिन समितिको प्रतिवेदनमा भनिएको छ, “परिमार्जित मस्यौदा प्रतिवेदन सदस्यहरूसँग छलफल गरी मात्र सभामा पेस गर्नुपर्नेमा सो नगरी सीमित व्यक्तिहरूसँग अनौपचारिक बैठक बसेर मिति २०८२ जेठ १३ गते प्रतिवेदन पठाइएको देखिन्छ। यसले सभापतिको समन्वयकारी भूमिकामा कमी देखायो।”
प्रतिवेदनमा थप उल्लेख छ कि सभापतिको हस्ताक्षरमा प्रतिवेदन पेश भएकोले गम्भीर त्रुटिका सम्बन्धमा उनले ‘उत्तरदायीपूर्ण भूमिका’ निर्वाह नगरेको ठहरिएको हो। त्यस्तै, सचिव दुराले प्रारम्भदेखि नै प्रतिवेदन लेखन र बैठकमा सक्रिय भूमिका खेले पनि परिभाषित जिम्मेवारी पूरा नगरेको निष्कर्ष छ।
प्रतिवेदनले अन्य कर्मचारी र पदाधिकारीहरूको विषयमा पनि टिप्पणी गर्दै ‘कुलिङ अफ पिरियड’ हटाउन समूह बनाएर सार्वजनिक रूपमा लबिइङ गर्नु पदीय आचरण विपरीत रहेको र समितिले पारित गरेको निर्णयको विपक्षमा देखिनु शोभनीय नदेखिएको उल्लेख गरेको छ।
प्रकाशित मिति: मंगलबार, साउन २८, २०८२
