नयाँदिल्ली, भारत । निर्वाचनमा भएको भनिएको अनियमितताविरुद्ध सोमबार नयाँदिल्लीमा आयोजित प्रदर्शनमा सहभागी हुँदै कांग्रेसका नेता राहुल गान्धीसहित थुप्रै विपक्षी सांसदहरू पक्राउ परेका छन्।
निर्वाचन आयोगको कार्यालय अगाडि पुगेका प्रदर्शनकारी सांसदहरूलाई प्रहरीले धरपकड गरेको हो। उनीहरूले आयोगमाथि सत्तारुढ भारतीय जनता पार्टी (बीजेपी)सँग मिलेर मत चोरी र परिणाम तोडमोड गरेको आरोप लगाएका छन्।
समाजवादी पार्टीका अध्यक्ष अखिलेश यादवसहितका नेताहरूले प्रहरीको अवरोध तोड्दै बेरिकेड नाघेका थिए। भीडमा धक्का–मुक्की, नाराबाजी र अव्यवस्थाबीच तृणमूल कांग्रेसकी सांसद महुआ मोइत्रा र मिताली बाउघ बेहोस भएकी थिइन्।
पक्राउ परेकामध्ये कांग्रेस अध्यक्ष मल्लिकार्जुन खड्गे, जयराम रमेश, डिएमकेका टी. आर. बालु, शिवसेना (उद्धव ठाकरे समूह) का संजय राउत, तृणमूल कांग्रेसका डेरेक ओ’ब्रायन, कांग्रेस महासचिव प्रियंका गान्धी भड्रा, समाजवादी पार्टीका अखिलेश यादव, साथै डिएमके, आरजेडी र वाम दलका सांसदहरू पनि छन्।
पक्राउ भएपछि राहुल गान्धीले पत्रकारहरूसँग भने, “यो राजनीतिक लडाइँ होइन, संविधान बचाउने संघर्ष हो। सत्य देशको अगाडि छ।” कांग्रेस अध्यक्ष खड्गेले यो आन्दोलन जनताको मतदान अधिकारको रक्षा गर्न भएको दाबी गर्दै ‘बीजेपीको तानाशाही अब नचल्ने’ चेतावनी दिए।
प्रकाशित मिति: सोमबार, साउन २७, २०८२
