प्रधानमन्त्री केपी शर्मा ओलीले आकासे वर्षाको भरपर्दा आएको संकट अन्त्य गर्दै तराईमा सिँचाइको स्थायी समाधान ल्याउने सरकारको संकल्प प्रष्ट पारेका छन्।
फेसबुकमार्फत सन्देश दिँदै उनले यस वर्षको खडेरीले तराईका धान खेतमा गम्भीर असर पारेको बताउँदै तत्कालका लागि ५०० वटा डीपबोरिङ जडान सुरु गरिएको र दीर्घकालीन समाधानका लागि सुनकोशी–मरिन डाइभर्सन परियोजना अघि बढाइरहेको जानकारी दिएका छन्।
ओलीका अनुसार खडेरीका कारण धान रोपाइँ गर्न नसक्ने अवस्था र रोपिएको बाली समेत सुक्ने स्थितिमा सरकारको तर्फबाट सुख्खाग्रस्त क्षेत्र घोषणा गर्दै राहत तथा सहयोगको विशेष निर्णय लिइएको हो।
पछिल्लो वर्षाले तराईमा हरियाली फर्काउन थालेको भन्दै उनले साउन २३ गतेसम्म मधेस प्रदेशका आठ जिल्लामा ७६.५४ प्रतिशत धान रोपाइँ पूरा भएको र छिट्टै सम्पूर्ण खेतमा हरियो सपना लहराउने विश्वास व्यक्त गरे।
“अब त्यो दिन टाढा छैन, जब किसानको मुस्कान, जमिनको हरियाली र समाजको खाद्यान्न भविष्य सुरक्षित हुनेछ,” ओलीले लेखे।
प्रकाशित मिति: आइतबार, साउन २६, २०८२
