२० भदौ, काठमाडौँ । एएफसी एसिया कप फुटबल २०१९ को छनौटमा आज नेपालले ताजकिस्तानको सामाना गर्दै छ । एन्फा कम्लेक्स सातदोबाटो ललितपुरमा दिउँसो ३ बजे सुरु हुने खेल प्रतियोगिताका लागि छनौटको सम्भावना राख्न दुबैले जित्नै पर्ने दबाब देखिन्छ । नेपालले अहिलेसम्म एक अंक जोडेको छ भने ताजकिस्तान अंकबिहीन अवस्थामा रहेको छ । नेपाली टोलीले सन् २०१६ को नोभेम्बर यता कुनै पनि खेल जितेको छैन । नेपालले पछिल्लो पटक सन् २०१६ को नोभेम्बर १५ एएफसी सोलिडारिटी कपको फाइनलमा मकाउलाई १–० ले हराएको थियो । त्यसपछि नेपाली टोलीले जित निकाल्न सकेको छैन । फिफा बरियतामा ताजकिस्तान १ सय ५१ औं स्थानमा छ भने नेपाल १ सय ६९ औं स्थानमा छ । छनौट चरणको समूह ‘ई’ मा रहेको नेपालले अहिलेसम्म दुई खेलबाट एक अंक जोडेको छ । नेपालसँग खेल्न लागेको ताजकिस्तानले यसअघिका दुई खेल हारेको छ । यो समूहबाट फिलिपिन्सले ६ तथा यमनले ४ अंक जोडेका छन् । यी दुई बिचको खेल पनि मंगलबार नै फिलिपिन्समा हुँदै छ ।
प्रकाशित मिति: सोमबार, भदौ १९, २०७४
