३० जेठ, काठमाडौँ । एएफसी एसियन कप छनौट अन्तर्गत आफ्नो दोस्रो खेलमा नेपालले यमनलाई गोल रहित बराबरीमा रोकेको छ । राजधानीको हल्चोकस्थित सशस्त्र प्रहरीको मैदानमा भएको खेल बराबरीमा सकिएपछि छनौट खेलमा नेपालले पहिलो अंक जोडेको छ । यसले सन् २०१९ मा हुने एसियन कप फुटवल खेल्ने नेपालको सम्भावना कायमै राखेको छ । अधिकांश खेल आफ्नो नियन्त्रणमा राखेपनि नेपालले गोल गर्न भने सकेन । गोल गर्ने करिब आधा दर्जन सुनौला अवसर नेपालले खेर फालेको थियो । नेपाल पहिलो खेलमा फिलिपिन्ससंग ४–१ ले पराजित भएको थियो भने यमनले ताजाकिस्तानलाई २–१ ले हराएको थियो । नेपाल सहित ४ टोली सहभागी समुह एफबाट शीर्ष स्थानमा रहने २ टोली आसन्न एसियाकपका लागी छनौट हुनेछन् ।
प्रकाशित मिति: सोमबार, जेठ २९, २०७४
