९ चैत, काठमाडौँ । नेपाल ओलम्पिक कमिटीका अध्यक्ष जीवनराम श्रेष्ठले सरकारले विभेदकारी रुपमा रुक्मशमशेर राणाको समूहलाई ओलम्पिक भवनमा प्रवेश गराएको आरोप लगाएका छन् । श्रेष्ठपक्षले बुधबार राजधानीमा पत्रकार सम्मलेन गरी सरकारको बलमा कार्यालय नियन्त्रणमा लिइएको आरोप लगाएको हो । सुरक्षाकर्मीको सहयोगमा मंगलबार रुक्मशमशेर राणापक्ष सातदोबाटोस्थित नेपाल ओलम्पिक कमिटीको भवनमा प्रवेश गरेको थियो । गत माघ ११ गतेदेखि ओलम्पिक कमिटीमा लागेको ताला खोल्दै राणापक्ष कार्यालय प्रवेश गरेको हो । श्रेष्ठले आफ्नो नेतृत्वको ओलम्पिक कमिटीलाई अन्तर्रा्ष्ट्रिय ओलम्पिक कमिटी तथा ओलम्पिक काउन्सिल अफ एसियाले मान्यता प्रदान गरेको भन्दै यो नै नेपालको एकमात्र आधिकारिक ओलम्पिक कमिटी भएको दाबी गरे । पछिल्लो घटनाक्रमलाई लिएर अन्तराष्ट्रिय ओलम्पिक कमिटी र ओलम्पिक काउन्सिल अफ एसियासँग छलफल भइरहेको भन्दै श्रेष्ठले आफूहरु चुप लागेर नबस्ने चेतावनीसमेत दिए ।
प्रकाशित मिति: मंगलबार, चैत ८, २०७३
