काठमाडौं । ओखलढुंगामा जीप दुर्घटना हुँदा ६ जनाको मृत्यु भएको छ भने तीन जना घाइते भएका छन् । मानेभञ्ज्याङ गाउँपालिका–६ स्थित डडुवाडाँडामा बा १६च २२०७ नम्बरको जीप दुर्घटना भएको हो ।
मृतक मध्ये चार पुरुष र दुई महिला छन् । मृत्यु हुनेमा ताप्लेजुङको ओलाङचुङ गोला बस्ने वर्ष ५५ को मिङ्मा शेर्पा, सोही ठाँउ बस्ने वर्ष ४५ को नाम्गेल शेर्पा, काठमाडौ बौद्ध बस्ने वर्ष ३५ का नुर्बु शेर्पा, वर्ष ३५ का ङावाङ शेर्पा, डोमा शेर्पा र वर्ष ३२ की नुमा शेर्पा रहेको जिल्ला प्रहरी कार्यालय ओखलढुंगाले जनाएको छ । घाइते हुनेमध्ये चालक काठमाडौं बौद्ध बस्ने कृष्ण श्रेष्ठको मात्र पहिचान भएको छ भने अन्य दुई जनाको पहिचान हुन बाकी रहेको छ ।
मृतक तथा घाइतेहरु सबै बौद्ध धर्मावम्बीहरु रहेको र उनीहरु सोलुखुम्बुको जुनबेशी गुम्बाको दर्शन गरेर काठमाडौं फर्किदै गर्दा दुर्घटनामा परेको प्रहरीले जनाएको छ ।
प्रकाशित मिति: आइतबार, चैत १७, २०७५
-1732776560.jpg)
