काठमाडौं : वैदेशिक रोजगारीका नाममा ठगी गर्ने भोजपुर घर भई झापाको पथरिया बस्ने पर्शुराम गुरुङ बुधबार थाइल्याण्डमा पक्राउ परेका छन् ।
रोजगारीका लागि विभिन्न देश पठाइदिने प्रलोभन दिई करोडौँ रुपैयाँ ठगी गरेको आरोप लागेका गुरुङलाई थाइल्याण्डस्थित नेपाली राजदूताबास र नेपाल प्रहरीको सहयोगमा त्यहाँको प्रहरीले पक्राउ गरेको हो । उनले क्यानडा, अष्ट्रेलिया, अमेरिका, कोरिया, मकाउलगायत देश पठाइदिने प्रलोभन दिएर विभिन्न व्यक्तिबाट करोडौँ रुपैयाँ ठगी गरेको भन्दै राजदूताबासमा उजुरी परेको थियो । फरार गुरुङमाथि नेपाल प्रहरीले इन्टरपोलमार्फत् पक्राउ पूर्जीसमेत जारी गरेको थियो ।
उनलाई आज थाइल्याण्डको प्रहरीले नेपाली राजदूताबासका प्रतिनिधिको उपस्थितिमा बैंककमा पत्रकार सम्मेलन गरी सार्वजनिक गरेको दूताबासद्वारा जारी विज्ञप्तिमा उल्लेख छ । थाइल्याण्डमा अवैध राहदानी र बिनाप्रवेशाज्ञा गैरकानुनी रूपमा बसेको अपराधमा समेत त्यहाँको सरकारले गुरुङमाथि अनुसन्धान र कारवाही भइरहेको जनाएको छ ।
नेपाल र थाइल्याण्डको वर्तमान कानुन तथा पारस्परिक सहयोगका आधारमा उनीमाथि कारवाही अघि बढाइने बताइएको छ ।
-1732776560.jpg)
