काठमाडौं : प्रतिनिधिसभाका उपसभामुख डा. शिवमाया तुम्बाहाम्फेले समानता र समताले मात्र समाजमा लिङ्गीय विभेद अन्त्य हुने बताएकी छन् ।
शान्ति, न्याय र लोकतन्त्रका लागि महिला सञ्जाल (संकल्प)ले प्रकाशन गरेको ‘हाम्रो महिला प्रतिनिधि’ नामक पुस्तक विमोचन गर्दै यस्तो बताएकी हुन् ।
कार्यक्रममा समाजमा विभेद अन्त्य र समानताका लागि पुरुषको सोचमा परिवर्तन गर्नु आवश्यक भएको भन्दै उनले महिला अधिकारका लागि आवाज उठाउनुपर्ने बताइन् । समृद्ध समाजका लागि जनसंख्याअनुसारको सहभागिता आवश्यक भएकाले यसका लागि सबै तहबाट पहल गर्नुपर्ने बताइन् । ‘सामाजिक परिवर्तनमा विभेद अन्त्य गर्नु भनेको महिलाको अधिकार खोज्नु मात्र होइन, पुरुषको सोचमा परिवर्तन गरेर समानता र समता कायम गर्नु पनि हो’, उनले भनिन् ।
महिलाहरूलाई राजनीतिक क्षेत्रमा मात्र नभई सामाजिक र आर्थिक क्षेत्रमा पनि महिलाको सहभागिता समान हुनुपर्ने बताइन् ।
संकल्पका अध्यक्ष लिली थापाले राजनीतिक क्षेत्रमा महिलाहरूलाई संगठित गर्न संकल्पको देन रहेको बताइन् । संकल्पको महत्त्वपूर्ण भूमिकाले संविधानमा महिलाको अधिकार, तीनै तहको सरकारमा संविधानअनुसार महिलाको उपस्थिति र विभिन्न ऐन तथा नियम बनाउन दबाब सिर्जना गरेकाले राम्रो काम गरेको बताइन् । महिलाहरूले आफ्नो क्षेत्रबाट अधिकारका लागि संघर्ष गरिरहँदा सबै क्षेत्रमा महिलाहरूलाई संगठित गरेर अघि बढ्ने काम संकल्पले गरेको बताइन् ।
प्रकाशित मिति: बुधबार, चैत १३, २०७५
-1732776560.jpg)
