धम्बोझी ः जिल्लाको गुलरिया नगरपालिका–२ खैरापुरमा रहेको विश्वको दुर्लभ वन्यजन्तु कृष्णसार लोप हुने अवस्थामा रहेको छ ।
२०४३ सालसम्म ६ सयको सङ्ख्यामा रहेको कृष्णसार अहिले घटेर १८४ मात्र रहेको छ । नेपालमा सिकार गर्न प्रतिबन्धित २६ वन्यजन्तुमध्येमा कृष्णसार पर्दछ । जनसङ्ख्या बढ्दै जानु ,जनघनत्वको चाप बढ्नु र अवैध सिकारका कारणले गर्दा यस वन्यजन्तुको संरक्षणमा चुनौती आएको ५ नम्बर प्रदेश सांसद तिलक शर्मा हिमालले बताए ।
गुलरिया नगरपालिका–२ पटाहाखैरापुरमा २०३२ सालमा केवल ५ वटा कृष्णसार फेला पारिएको थियो । त्यसमा २ भाले ३ पोथी थिए । तिनलाई तत्कालीन शाही कर्णाली सिकार आरक्षले संरक्षण गरेको थियो । अहिले ७०८ बिघा क्षेत्रफलमा कृष्णसार रहने व्यवस्था गरिएको छ । यस कार्यका लागि करिब १ करोड ८० लाख खर्च गरिएको थियो । विश्व वातावरणीय सहुलीयत जिइएफ भन्ने दातृ संस्थाको सहयोगमा वातावरण बचाउन आन्दोलन सञ्चालन योजनाअन्तर्गत कृष्णसारको आहाराका रूपमा मुसुरो तथा दलहन जातिका बाली लगाउने कार्य गरिएको छ ।
प्रकाशित मिति: सोमबार, चैत ११, २०७५
-1732776560.jpg)
