बेत्रावती ः भूकम्पपछिको पुनर्निर्माणका लागि छुट्याइएको ३ लाख अनुदान पाउन योग्य (लाभग्राही) सूचीमा नपरेका भूकम्प प्रभावितको पुनः जाँच तथा सर्वेक्षण गरिने भएको छ ।
लाभग्राही सूचीमा समावेश हुन चाहेर निवेदन दिएका घरधनीको तथ्याङ्क संकलनका लागि प्राविधिक परिचालन गर्न लागिएको जिल्ला आयोजना कार्यान्वयन एकाइ (भवन) नुवाकोटका प्रमुख कोषनाथ अधिकारीले जानकारी दिए । उनका अनुसार जिल्लामा रहेका सबै स्थानीय तहमा २/२ जना इञ्जिनियर पुनः जाँच तथा सर्वेक्षणका लागि यही चैत १५ गतेदेखि परिचालन गर्न लागिएको छ ।
अझै धेरै भूकम्पपीडित राहत पाउनबाट छुटेकाले पुनः जाँच गर्न प्राविधिक टोली परिचालन गरिने जनाइएको छ । परिचालन भएका प्राविधिकले ३ हजार ५०० भन्दा बढी छुट भएका भूकम्प पीडितको पुनः जाँच तथा सर्वेक्षण गरेर प्राप्त तथ्याङ्क राष्ट्रिय पुनर्निर्माण प्राधिकरणमा बुझाउने अधिकारीले बताए ।
‘जिल्लास्थित विभिन्न निकायमार्फत सङ्कलन भएको ३ हजार ४१९ प्रभावितले आफूहरू वास्तविक भूकम्पपीडित भएको दाबी गर्दै दिएको निवेदनको आधारमा पुनः तथ्याङ्क सङ्कलन गर्न लागिएको हो,’ अधिकारीले भने, ‘स्थलगत रूपमा खटिने प्राविधिकले वैशाख मसान्तसम्म तथ्याङ्क लिएर विश्लेषणका लागि केन्द्रमा पठाउनेछन् ।’
प्राप्त तथ्याङ्कलाई राष्ट्रिय पुनर्निर्माण प्राधिकरणले विश्लेषण गरेपश्चात् लाभग्राही भए/नभएको पहिचान गर्ने भएकाले नतिजा आउन अरू थप समय लाग्ने देखिन्छ । नुवाकोटमा हालसम्म सर्वेक्षण नभएका २ हजार ६५०, सर्वेक्षणमा त्रुटि देखिएका ७०९ र बहुस्वामित्व भएका ६० घरधनीको पुनःजाँच एवं सर्वेक्षणका लागि टोली खटाउन लागिएको छ ।
खटिने टोलीलाई वास्तविक पीडितको लगत सङ्कलनमा सूचना दिन, सिफारिस गर्न सञ्चालित कार्यक्रमको अनुगमनका लागि सम्बन्धित स्थानीय तहका निर्वाचित प्रतिनिधिलाई कार्यालयले आग्रह गरेको छ ।
प्राविधिक परिचालनको लागि जिल्ला समन्वय समितिका प्रमुखको संयोजकत्वमा ७ सदस्य रहेको ‘छुट तथा पुनः जाँच सर्वेक्षण सञ्चालन जिल्ला समिति’ समेत गठन गरिएको छ । वास्तविक भूकम्पपीडित नछुटोस् भनेर स्थानीय जनप्रतिनिधिको सिफारिस र अनुगमनमा सर्वेक्षण गर्ने व्यवस्था मिलाइएको जिसस प्रमुख एवं समितिका संयोजक सन्तमान तामाङले बताए ।
प्रकाशित मिति: सोमबार, चैत ११, २०७५
-1732776560.jpg)
