काठमाडौं : सर्वोच्च अदालतले न्यायपालिकामा कार्यरत महिला कर्मचारीहरूको समस्यालाई ध्यानमा राखेर दिवा शिशु स्याहार केन्द्रको सुुरुवात गरेको छ ।
सर्वोच्च अदालतले आज एक कार्यक्रमको आयोजना गरेर न्यायपालिकामा कार्यरत कर्मचारीहरूका बालबालिका स्याहार्न सर्वोच्च परिसरमै दिवा शिशु स्याहार केन्द्रको स्थापना गरेको हो । सर्वोच्च अदालतका मुख्य रजिष्ट्रार नृपध्वज निरौलाले शिशु स्याहर केन्द्रको उद्घाटन गरेका हुन् । विशेषगरी महिला कर्मचारीहरूको सुत्केरी बिदा सकिएपछि बच्चालाई कसरी हुर्काउने भन्ने समस्या बढ्ने, बच्चा घरमै भएपछि काममा समेत प्रभावकारिता नहुने भएकाले दिवा शिशु स्याहार केन्द्रको स्थापना गरिएको मुख्य रजिष्ट्रार निरौलाले बताए । उनले स्याहार केन्द्रको स्थापनापछि बच्चाले पाउने फ्रेस फिडिङ र आमाले गर्ने नियमित काममा समेत सहजता र प्रभावकारिता हुने भएकाले केन्द्रको स्थापना गरिएको जानकारी दिए ।
कामकाजी बाबुआमा दुवैका विद्यालय जानुअघिका बालबालिकामा शारीरिक, बौद्धिक र मानसिक विकास गराई समयानुकूल वातावरणमा प्रवेश गराउनु नै केन्द्रको उद्देश्य रहेको शिशु स्याहार केन्द्रको स्थापना गर्न खटिएकी शाखा अधिकृत सम्झना सिंखडाले जानकारी दिइन् ।
शिशु स्याहार केन्द्रमा बालबालिकालाई आवश्यक पर्ने पौष्टिक आहारको व्यवस्था मिलाइएको छ । सुरुवातमा दुई जना आमा (कर्मचारीको) व्यवस्था गरिएको छ भने आवश्यक सहयोगका लागि सर्वोच्च प्रशासनलाई जिम्मा दिइएको छ । स्याहार केन्द्रमा छ महिनादेखि तीन वर्षसम्मका बालबालिकालाई राखिने भएको छ । स्याहार केन्द्रमा रहने बालबालिकाको भर्ना आजैबाट सुरु भइसकेको छ ।
प्रकाशित मिति: आइतबार, चैत १०, २०७५
-1732776560.jpg)
