काठमाडौं ः नारायणघाट–बुटवल ११४ किमि सडक ४ लेनमा स्तरोन्नतिको आज शुभारम्भ हुने भएको छ ।
एसियाली विकास बैंकको ऋण सहयोगमा सडक स्तरोन्नति हुन लागेको हो । प्रधानमन्त्री केपी शर्मा ओलीले आजै बुटवलमा सडक स्तरोन्नतिका लागि शिलान्यास गर्नेछन् । सडक स्तरोन्नतिका लागि गत पुसमा ठेक्का सम्झौता भएको थियो । २ खण्डमा सडक स्तरोन्नति गर्न लागिएको आयोजना निर्देशनालय (एडीबी) का उपआयोजना निर्देशक सुरेश पौडेलले राससलाई जानकारी दिए ।
पहिलो खण्ड गैंडाकोट–दाउन्ने ६५ किमि र दोस्रो खण्ड दाउन्ने–बुटवल ४८ किमि छ । दुवैको ठेक्का चाइना स्टेट कन्स्ट्रक्सनले पाएको आयोजनाले जनाएको छ । कुल लागत १५ अर्बमा साढे ३ वर्षमा यो सडक ४ लेनमा स्तरोन्नति गरिसक्ने ठेक्का सम्झौतामा उल्लेख छ ।
निर्माण सम्पन्न भएको ४ वर्षसम्म निर्माण व्यवसायीले नै मर्मतसम्भार गर्नुपर्ने उपआयोजना निर्देशक पौडेलले बताए । हाल निर्माण व्यवसायीले डिजाइनको काम गरिरहेको छ । २ महिनामा भौतिक रूपमै सडक स्तरोन्नतिको काम सुरु हुनेछ ।
प्रकाशित मिति: शुक्रबार, चैत ८, २०७५
-1732776560.jpg)
