काठमाडौँ । लगातार १५० अङ्कले उकालो लागेको सेयर बजारमा पछिल्ला दुई कारोबार दिनमा ६२ अङ्कको करेक्सन आएको छ । गएको मङ्गलवार र बिहीबार (आज) दुई कारोबार दिनमा नेप्से ६२.३८ अङ्कले घटेको छ ।
नेपाल स्टक एक्सचेन्ज (नेप्से)का अनुसार मङ्गलवार परिसूचक २१ अङ्कले घटेको थियो । बिहीबार ४१.०४ अङ्कले घटेर २१४९.३९ विन्दुमा रोकिएको छ ।
यस दिन नेप्से परिसूचकसँगै कारोबार रकम पनि घटेको छ । मङ्गलवार सात अर्ब ६७ करोड रुपैयाँको सेयर कारोबार भएको थियो । आज पाँच अर्ब ४७ करोड रुपैयाँको सेयर खरिद–बिक्री भएको छ ।
यस दिन २५२ धितोपत्र एक करोड ४४ लाख ८२ हजार ९५९ कित्ता खरिद–बिक्री भएको छ । बिहीबार लगानीकर्ताको सम्पत्ति (कुल बजार पुँजीकरण) ३१ खर्ब तीन अर्ब १५ करोड रुपैयाँ कायम भएको छ । मङ्गलवारको तुलनामा कुल बजार पुँजीकरण घटेको छ । मङ्गलवार कुल बजार पुँजीकरण ३१ खर्ब ६२ अर्ब ४० करोड रुपैयाँ थियो ।
आज चार धितोपत्रको मूल्य सर्वाधिक वृद्धि भएको छ । कुमारी धन वृद्धि योजना र सिंगटी हाइड्रो इनर्जीको मूल्य १० प्रतिशतले वृद्धि भएको छ । वाराही हाइड्रोपावर पब्लिक लिमिटेड र एनआईबिएल समृद्धि फण्ड-२ को मूल्य ९ प्रतिशतभन्दा बढीले वृद्धि भएको छ ।
सर्वाधिक रकमको सेयर खरिद–बिक्री शिवम् सिमेन्टको भएको छ । यो कम्पनीको २२ करोड २० लाख रुपैयाँको सेयर खरिद–बिक्री भएको छ । रिडी पावर कम्पनीको १७ करोड ८३ लाख रुपैयाँको सेयर खरिद–बिक्री भएको छ ।
कारोबारमा आएका १३ मध्ये व्यापार समूहको परिसूचक वृद्धि भएको छ । बाँकी समूहको परिसूचक घटेको छ । व्यापार समूहको परिसूचक ०.६६ प्रतिशतले वृद्धि भएको छ ।
परिसूचक सर्वाधिक घट्नेमा फाइनान्स कम्पनी छ । यो समूहको परिसूचक ३.७ प्रतिशतले घटेको छ ।
प्रकाशित मिति: बिहीबार, पुस २८, २०७९ १६:४७
