काठमाडौं । नेपाली कांग्रेसभित्र विशेष महाधिवेशनको विषयमा सहमति जुट्न सकेको छैन। पार्टी केन्द्रीय कार्यालय सानेपामा बिहीबार बसेको कार्यसम्पादन समितिको बैठकमा महामन्त्री गगन थापाले विशेष महाधिवेशनको आह्वान फिर्ता लिन अस्वीकार गर्दै बैठकमै स्पष्ट असहमति जनाएका छन्।
बैठकपछि सञ्चारकर्मीसँग कुरा गर्दै महामन्त्री थापाले नियमित महाधिवेशनको क्यालेन्डर सार्वजनिक भइसकेपछि विशेष महाधिवेशन आवश्यक नपर्ने भन्ने धारणा विधानविपरीत भएको बताए। उनले यस्तो व्याख्यालाई विधानको अपव्याख्या भएको आरोप लगाए।
“नियमित महाधिवेशनको कार्यतालिका आयो भने विशेष महाधिवेशन बोलाउन नपाइने भन्ने कुरा विधानमा छैन,” थापाले भने, “यो विधानको खिलाप हो, त्यसैले म यसमा सहमत हुन सकिनँ।”
विशेष महाधिवेशन महाधिवेशन प्रतिनिधिहरूको वैधानिक अधिकार भएको दाबी गर्दै थापाले पुस २७ र २८ गते विशेष महाधिवेशन गर्ने तयारी गरिएको जानकारी दिए। केन्द्रबाट आह्वान नभए पनि विशिष्ट आवश्यकता परे महाधिवेशन प्रतिनिधिहरूले विशेष महाधिवेशन माग गर्न सक्ने अधिकार विधानले दिएको उनले स्पष्ट पारे।
“४० प्रतिशत महाधिवेशन प्रतिनिधिले विशेष महाधिवेशन बोलाउन सक्ने व्यवस्था विधानमै छ, तर त्यसलाई वेवास्ता गरिएको छ,” उनले भने, “मैले यो विषय कार्यसम्पादन समिति बैठकमै राखेको छु।”
थापाले गोदावरीमा सम्पन्न महासमिति बैठकमै २०८२ सालमा नियमित महाधिवेशनको कार्यतालिका प्रस्ताव गरेको स्मरण गराउँदै त्यो बेला केन्द्रीय कार्यसमितिको अधिकार भन्दै टारिएको बताए।
संवेदनशील राजनीतिक अवस्थामा विधानको पालनाका लागि विशेष महाधिवेशन माग गरिएको भन्दै उनले त्यसलाई पार्टी विभाजनसँग जोडेर हल्ला चलाइएकोप्रति पनि आपत्ति जनाए।
प्रकाशित मिति: बिहीबार, पुस २४, २०८२
