लण्डन । बेलायती प्रधानमन्त्री थेरेसा मेले प्रस्ताव गरेको युरोपेली संघ (इयु) बाट बाहिरिने सम्झौता दोस्रो पटक पनि बेलायती संसदले अस्वीकृत गरिदिएको छ ।
बेलायत यही मार्च २९ मा युरोपेली संघबाट औपचारिक रुपमा बाहिरिदै छ । ब्रेक्जिटको मिति नजिकिएका बेला मंगलवार संसदको तल्लो सदनमा भएको मतदानमा बहुमतले प्रधानमन्त्रीको प्रस्ताव अस्वीकृत भएको हो ।
अब सांसदहरुले बिना कुनै सम्झौता इयु छाड्ने प्रस्तावबारे मतदान गर्नुपर्नेछ । मंगलबार साँझ संसदमा थकित र स्वर बसेको लवजमा बोल्दै प्रधानमन्त्री मेले आफू निकै दुःखी भएको बताइन् ।
उनले भनिन्, ‘म अझै पनि के कुरामा विश्वस्त छु भने सबैभन्दा उपयुक्त नतिजा भनेको व्यवस्थित रूपबाट सम्झौतासहित इयु छाड्नु नै हुनेछ । र हामीहरूले तय गरेको सम्झौता नै हामीसँग उपलब्ध भएकोमध्ये सबैभन्दा उपयुक्त समेत हो ।’
उनले सांसदहरूलाई ढिलो गरि हुने बहिर्गमन चाहेको वा अर्को जनमत संग्रह चाहेकोमा निर्णय लिन पनि आग्रह गरेकी छन् ।
बेलायतसामू भएका ती विकल्प सहज नभएको बताउँदै उनले आफ्नो प्रस्ताव अस्वीकृत भएपनि बाँकी विकल्पको सामना गर्नुको विकल्प नरहेको बताइन् ।
बिना कुनै सम्झौता इयु छाडिने अवस्थामा आयरल्याण्डसँगको सीमा व्यवस्थापन कसरी गरिने भन्ने योजना बुधवार सरकारले घोषणा गर्ने उनको भनाइ थियो ।
बुधवारको मतदानमा विना सम्झौता इयु छाड्ने प्रस्ताव स्वीकृत नभए बिहीवार ब्रेक्जिट प्रकृया नै ढिलो गर्ने विकल्प माथि मतदान हुने बताइएको छ ।
प्रमुख विपक्षी दल लेबर पार्टीका नेता जेरेमी कर्बिनले प्रधानमन्त्रीको प्रस्ताव स्पष्ट रूपमा विफल भइसकेकोले अब आमचुनावको घोषणा हुनुपर्ने बताएका छन् ।
इयुका ब्रेक्जिटसम्बन्धी मुख्य वार्ताकार मिसेल बार्नियरले ट्वीट गर्दै इयुले समयमै बहिर्गमनसम्बन्धी सम्झौता गराइसक्न आफ्नो तर्फबाट भरमग्दुर प्रयास गरेको उल्लेख गरेका छन् ।
प्रकाशित मिति: बुधबार, फागुन २९, २०७५
-1732776560.jpg)
