नयाँ दिल्ली। अमेरिकाले भारतमाथि थप २५ प्रतिशत आयात शुल्क (extra tariff) लागू गर्ने आधिकारिक घोषणा गरेको छ। यस कदमसँगै भारतमाथिको कुल शुल्क ५० प्रतिशत पुगेको छ। नयाँ नियम बुधबार बिहानदेखि लागू हुनेछ। अमेरिकी प्रशासनले यस निर्णयको कारण भारतले रुससँग तेलको व्यापार जारी राख्नु रहेको उल्लेख गरेको छ। अमेरिकी राष्ट्रपति डोनाल्ड ट्रम्पले यसअघि नै चेतावनी दिएका थिए कि यदि भारतले रुसबाट तेल खरिद गर्न रोक्दैन भने थप प्रतिबन्धात्मक ट्यारिफ लागू गरिनेछ।
विशेषज्ञहरूले उल्लेख गरेका छन् कि यस अतिरिक्त ट्यारिफले भारतीय निर्यातमा ठूलो असर पार्नेछ। गहना, कपडा, अटोमोबाइल र समुद्री खानेकुरा क्षेत्र सबैभन्दा बढी प्रभावित हुनेछन्। अमेरिकामा यी वस्तु महँगो हुने भएकाले अमेरिकी ग्राहकहरूको माग घट्ने सम्भावना छ। करिब ४८ अर्ब डलर बराबरको भारतीय निर्यात जोखिममा परेको छ। उत्पादन कटौती हुन सक्ने र रोजगारी गुम्ने खतरा बढ्ने अनुमान पनि गरिएको छ।
हालका लागि आईटी सेवा, औषधि र इलेक्ट्रोनिक्स उद्योगलाई छुट दिइएको छ। इलेक्ट्रोनिक्स क्षेत्रमा ‘सेक्सन २३२’ अन्तर्गत विशेष छूट कायम छ र फार्मास्यूटिकल्समा हाल ०% शुल्क लागू छ। तर अमेरिकी प्रशासनले आगामी १८ महिनाभित्र यसमा वृद्धि गर्न सक्ने चेतावनी दिएको छ।
विशेषज्ञहरूले भन्छन् कि निर्यातमा घटबढले भारतको जीडीपी वृद्धिदरमा ०.२ देखि ०.६ प्रतिशतसम्मको कमी आउन सक्नेछ। यसले भारतलाई व्यापार नीति फेरबदल गर्न बाध्य पार्नेछ र अमेरिकी बजार बाहेक युरोप, रुस र अन्य एशियाली बजारतर्फ ध्यान केन्द्रित गर्नुपर्ने स्थिति सिर्जना गर्नेछ। उद्योगपतिहरूले नयाँ निर्यात गन्तव्य खोज्नुपर्ने चुनौतीसँगै उत्पादन र रोजगारीमा असर पर्ने चिन्ता पनि बढेको छ।
प्रकाशित मिति: मंगलबार, भदौ १०, २०८२
