काठमाडौं : स्पर्श लघुवित्त वित्तीय संस्थाले भाेलि आइतबार आईपीओ खाेल्ने भएकाे छ । उसले दुई लाख ५२ हजार कित्ता आईपीओ सर्वसाधारणलाई बिक्री गर्ने भएको छ ।
कम्पनीले कुल दुई लाख ६९ हजार छ सय ३० कित्ता सेयरमध्ये ०.५% (४ हजार १४८ कित्ता) कर्मचारीलाई र ५% (१३ हजार ४८२ कित्ता) सेयर सामूहिक लगानी कोषलाई छुट्याएर बाँकी रहेको सेयर सर्वसाधारणलाई बिक्री गर्न लागेको हो । यस आईपीओमा फागुन २९ गतेसम्म आवेदन दिन सकिनेछ । यस अवधिमा सबै सेयर बिक्री नभएमा भने चैत २५ गतेसम्म भर्न सकिनेछ ।
सी–आस्वाबाट आवेदन दिनुपर्नेछ । बिक्री प्रबन्धकको काम सानिमा क्यापिटलले गरेको छ । लगानीकर्ताले न्यूनतम १० कित्ता र अधिकतम १३ सय ४० कित्तासम्म यो आईपीओ भर्न सक्नेछन् । यस आईपीओको प्रतिकित्ता भाउ एक सय रुपैयाँ हुने छ । स्पर्शले आईपीओ बिक्रीबाट आउने रकममध्ये दुई करोड रुपैयाँ पशुपालन तथा कृषि कर्जामा उपयोग गर्ने भएको छ ।
यस्तै, खुद्रा व्यापार तथा सेवा कर्जामा ४० लाख र साना तथा घरेलु उद्योग कर्जामा २९ लाख ६३ हजार रुपैयाँ उपयोग गर्ने जनाएको छ । यस लघुवित्तले आईपीओ बिक्री गरी आठ करोड २९ लाख ६३ हजार रुपैयाँ चुक्ता पुँजी पुर्याउने छ । चालु आर्थिक वर्षको पुस मसान्तसम्म स्पर्शले छ लाख २१ हजार रुपैयाँ खुद नाफा कमाएको छ ।
चालु आर्थिक वर्षको अन्त्यसम्म एक करोड ४२ लाख ६६ हजार रुपैयाँ खुद नाफा कमाउने प्रक्षेपण छ । यस्तै, आगामी आर्थिक वर्षमा दुई करोड ७५ लाख रुपैयाँ खुद नाफा कमाउने योजना बनाएको छ ।
प्रकाशित मिति: शनिबार, फागुन २५, २०७५
-1732776560.jpg)
