ललितपुर ः खाद्य सम्प्रभुता र किसान अधिकारसम्बन्धी प्रथम अन्तर्राष्ट्रिय सम्मेलन यही फागुन २६ देखि २८ गतेसम्म हुने भएको छ । राष्ट्रिय किसान आयोगले बुधबार आयोजित पत्रकार सम्मेलनमा किसानको अधिकारलाई ऐनमा सुरक्षित गर्ने उद्देश्यले सो सम्मेलन आयोजना गर्न लागेको जनाएको छ ।
सम्मेलनमा खाद्य सम्प्रभुतासम्बन्धी विभिन्न विधामा १५ वटा कार्यपत्र प्रस्तुत गरिनेछ । उक्त सम्मेलनमा नेपाल, बंगलादेश, चीन, भारत, इन्डोनेसिया, मलेसिया, पाकिस्तान, फिलिपिन्स, श्रीलंकालगायत विभिन्न देशका पदाधिकारी, प्राज्ञ, किसान, कृषि सहकारीमा आबद्ध व्यक्ति, उद्योगी, व्यवसायी तथा कृषि विज्ञ गरी कुल ३५० जनाको सहभागिता रहने आयोगका अध्यक्ष चित्रबहादुर श्रेष्ठले जानकारी दिए ।
उक्त सम्मेलनबाट किसानका अधिकार, खाद्य सम्प्रभुता तथा सुरक्षाका साथै कृषिसम्बन्धी नीति, रणनीति निर्माण गर्न सहयोग पुग्ने आयोगले बताएको छ ।
मानव स्वास्थ्यसँग सरोकार राख्ने किसानसँग विस्तृत छलफल गर्नेलगायत वातावरणसम्बन्धी ऐन कार्यान्वयनमा ल्याउन पहल गर्ने आयोगले जनाएको छ ।
प्रकाशित मिति: बिहीबार, फागुन २३, २०७५
-1732776560.jpg)
