काठमाडौं . विश्वका अर्बपतिहरुको सूची सार्वजनिक भएको छ । फोब्र्सले सार्वजनिक गरेको अर्बपतिहरुको नयाँ सूचीमा अमेजनका संस्थापक जेफ बेजोस १ नम्बरमा रहेका छन् । उनसको सम्पत्ति १३१ बिलियन डलर रहेको छ । उनको कुल सम्पत्ति गत वर्षको भन्दा १९ अर्ब अमेरिकी डलरले बढेको छ ।
यसैगरी बिल गेट्स ९६.५ बिलियन अमेरिकी डलरसहित दोस्रो स्थानमा छन् भने तेस्रो स्थानमा रहेका वारेन बफेटको सम्पत्ति ८२.५ बिलियन अमेरिकी डलर छ ।
तर फेसबुकका संस्थापक मार्क जुकर्बर्गको सम्पत्ति भने घटिरहेको छ । त्यस्तै अमेरिकी राष्ट्रपति डोनाल्ड ट्रम्पको सम्पतिपनि निरन्तर घटेको छ । फोब्र्सको सूची अनुसार गत वर्ष जुकरवर्गको सम्पत्ति ६२.३ अर्ब अमेरिकी डलर रहेकोमा यो वर्ष ८.७ अर्ब डलरले घटेको छ ।
फोब्स म्यागजिनको अर्बपतिहरुको सूचीमा रहेका नेपालका एकमात्रै अर्बपति विनोद चौधरीको सम्पत्ति १.७ बिलियन अमेरिकी डलर छ । उनी सूचीको १३४९ औं नम्बरमा रहेका छन् । उनी सन् २०१३ देखि फोब्र्सको सूचीमा रहँदै आएका छन् ।
फोब्र्सको गणनामा परेका दुई हजार एक सय ५३ अर्बपतिमध्ये २५२ जना महिलाहरू छन् । आफ्नै पौरखमा सबैभन्दा धनी महिला भने चीनकी प्रभावशाली रियल स्टेट व्यवसायी वु याजुन छिन् । उनको सम्पत्ति ९.४ बिलियन डलर छ ।
आफ्नै प्रयासमा अर्बपति हुने त्यस्ता महिलाको संख्या पहिलो पटक सबैभन्दा धेरै ७२ पुगेको छ । गत वर्ष यो संख्या ५६ थियो ।
फोब्र्सको सूचीअनुसार अमेरिकाका अर्वपतिहरुको संख्यामा वृद्धि भएको छ । गतवर्ष ५८६ अर्वपति सूचीमा परेका थिए भने यस वर्ष ६०७ अर्बपतिहरु सूचीमा अटेका छन् ।
चीनका अर्बपतिहरुकोे संख्या गत वर्षको तुलनामा कमी आएको छ । गत वर्ष ३७२ जना अर्वपतिहरु सूचीमा थिए भने यस वर्ष ३२४ छन् ।
फोब्र्सको सूचीमा १९५ धनी व्यक्ति थपिएका छन् । उदीयमान महिलाहरुको सूचीमा १ जना महिला थपिएकी छन् । गत वर्ष सूचीमा २४२ जना उदीयमान महिला थिए भने यस वर्ष २४३ जना छन् ।
विश्वको सर्वाधिक धनी महिलाको सूचीमा फ्रान्सस्कासी बेटेनकोर्ट मियर्स परेकी छिन् । उनीसँग ४९.३ बिलियन अमेरेकी डलर रहेको सूचीमा उल्लेख छ ।
प्रकाशित मिति: बुधबार, फागुन २२, २०७५
-1732776560.jpg)
