काठमाडाैं ः बैंककमा जारी आईसीसी टी–२० विश्वकपअन्तर्गत एसिया क्षेत्रीय छनोटको दोस्रो खेलमा नेपाल थाइल्यान्डसँग ५७ रनले पराजित भएको छ । प्रतियोगिता दाबेदार मानिएको थाइल्यान्डले लगातार तेस्रो जित हासिल गर्दा नेपालले पहिलो हार बेहोरेको हो ।
टस जितेर पहिले ब्याटिङ गरेको थाइल्यान्डले २० ओभरमा ७ विकेट गुमाएर १२४ रन बनायो । ओपनर नाइमुइ चेइवइ ३२, बोचाथम १२ रन, चनीदा सुथिरुंगाले ३५ रन बनाए । यस्तै वोङपाकाले २८ रनको योगदान गरिन् ।
१२५ रनको लक्ष्य पछ्याएको नेपालले २० ओभरमा ८ विकेट गुमाएर ६७ रन मात्र बनाउन सक्यो । जवाफमा लागि इन्दु बर्माले २९, सीता राना मगरले १८ रन बनाउनुबाहेक अन्य कुनै पनि खेलाडीले दोहोरो रनको स्कोर छुन सकेनन् । खराब सुरुवात गरेको नेपालले २ रनमा २ विकेट गुमाएको थियो ।
नेपालका लागि काजोल श्रेष्ठ, रोमा थापा, सरिता मगरले १/१ रन मात्र बनाउन सके भने कप्तान रूबिना क्षत्रीले ३ रन जोडिन् । नेपालका लागि ममता चौधरी ५ रन बनाएर आउट भइन् ।
यो प्रतियोगिताको शीर्ष स्थानमा रहने टिम मात्र विश्वकप छनोटको अन्तिम चरणमा प्रवेश गर्नेछ ।
प्रकाशित मिति: बिहीबार, फागुन ९, २०७५
