भारतीय प्रधानमन्त्री नरेन्द्र मोदीले कश्मिरमा भएको हमलाका दोषीले ठूलो मूल्य चुकाउनुपर्ने चेतावनी दिएका छन् ।
कश्मिरको पुलवामा राजमार्गमा विद्रोहीले गराएको शक्तिशाली विस्फोटमा परी ४० जना केन्द्रिय रिजर्भ प्रहरी बलका जवानको मृत्यु भएको थियो ।
मोदीले भने, ‘दोषीमाथि कारबाही हुन्छ । यो हमलाका पछि जुन शक्तिको हात छ, जो दोषी हो, त्यसमाथि अवश्य सजाय हुन्छ ।’
उनले यो घटनामा देशका सबै राजनीतिक पार्टी एक ठाउँमा रहेको र सबै मिलेर यसको सामना गर्ने उल्लेख गर्दै उनले आफूहरुले जित्नका लागि लडाई लडिरहेको उल्लेख गरे ।
उनले पाकिस्तानप्रति लक्षित गर्दै भने, ‘पूरै विश्वमा एक्लिदै गएको हाम्रो देश भारतमा अस्थिरता पैदा गर्न सकिन्छ कि भन्ने सोचिरहेको छ, यो सपना देख्न छोडे हुन्छ । भारतमा अस्थिरता पैदा गरेर आफ्नो स्वार्थ पूरा हुँदैन ।’
उनले भारतीय जनताले यस्ता हरेक हमलाको कडा जवाफ दिने बताए । उनले यो हमलाको निन्दा गर्ने देशप्रति आभार व्यक्त गर्दै आतंकवाद अन्त्यका लागि एकजुट हुन आग्रह समेत गरेका छन् ।
बिहीबार भएको सो घटनाको जिम्मेवारी भारतबाट कश्मिर अलग हुनुपर्ने भन्दै संघर्षरत जैस ए–मोहम्मद समूहले लिएको छ । यो संगठनप्रति पाकिस्तानले नरम नीति अवलम्बन गर्दै आएको छ ।
लामो समयदेखि तनावपूर्ण रहेको भारत–पाक सम्बन्ध यो घटनाले झनै चिसिने आशंका गरिएको छ । एजेन्सी
प्रकाशित मिति: शुक्रबार, फागुन ३, २०७५
-1732776560.jpg)
