युरोपको दोस्रो ठूलो क्लब फुटबल प्रतियोगिता युरोपा लिग अन्तर्गत राउण्ड अफ ३२ को खेलमा इंग्लिस क्लब चेल्सी र इटालियन क्लब नापोली विजयी हुँदा अर्को इग्लिस क्लब आर्सनल भने पराजित भएको छ ।
बिहीबारराति भएको खेलमा चेल्सीले माल्मो एफएफलाई उसकै मैदानमा २–१ ले पराजित गर्दै अन्तिम १६ मा पुग्ने सम्भावना बलियो बनाएको छ ।
चेल्सीको जितमा रोस बार्कली र ओलिभर जिरुडले एक एक गोल गरे भने माल्मोका लागि एन्डर्स क्रिष्टियन्सनले एक गोल फर्काएका थिए । अब दोस्रो लेगको खेल २१ फेब्रुअरीमा चेल्सीको मैदान स्टामफोर्ड ब्रिजमा हुनेछ ।
युरोपा लिगको अर्को खेलमा आर्सनल भने बाते बोरिसोभसँग १–० ले स्तब्ध बनेको छ । खेलको पहिलो हाफमा नै पछि परेको आर्सनलले गोल गर्न नसकेपछि पराजित हुन पुगेको हो ।
यसैगरी युरोपा लिगकै अर्को खेलमा इटालियन क्लब नापोली विजयी भएको छ । नापोलीले एफसी जुरिचमाथि ३–१ को जित निकाल्दै अन्तिम १६ को यात्रा सहज बनायो ।
प्रकाशित मिति: शुक्रबार, फागुन ३, २०७५
-1732776560.jpg)
