काठमाडौं : नेपालमा पहिलो पटक महिलाको क्रिकेट लिग आयोजना हुने भएको छ ।
आयोजक क्विन्स इभेन्ट म्यानेजमेन्ट प्रालिले आज पत्रकार सम्मेलन गर्दै पहिलो पटक नेपालमा महिलाको क्रिकेट लिग आयोजना गर्न लागेको जानकारी गराएको हो ।
प्रतियोगिता आगामी चैत २२ देखि ३० गतेसम्म काठमाडौंको कीर्तिपुरस्थित त्रिवि मैदानमा हुने आयोजक संस्थाका प्रबन्ध निर्देशक छुम्बी लामाले जानकारी दिए । प्रतियोगितामा पाँच शहरका पाँच टोलीको सहभागिता रहनेछ । पहिलो सिजनमा पाँच शहरका पाँच टोलीले प्रतिस्पर्धा गर्नेछन्, यसमा पुरुषकै जस्तो महिला खेलाडीलाई पनि व्यावसायिक बनाउने प्रयास रहनेछ , लामाले भने ।
प्रतियोगिताको पुरस्कार राशि र सहभागी टोलीबारे छलफल भइरहेको र केही समयपछि जानकारी दिने उनको भनाइ थियो । प्रतियोगितामा विदेशी खेलाडी नहुने र खेलाडी छनोट लीलाम बढाबढ (अक्सन)बाट गर्ने वा नगर्ने भन्ने जानकारीसमेत केही दिनमै सार्वजनिक गर्ने तयारी छ ।
कार्यक्रममा राष्ट्रिय पुरुष टोलीका प्रशिक्षक जगत टमाटाले प्रतियोगिताले महिला टोलीमा राम्रो सन्देश प्रवाह हुने बताए ।
राष्ट्रिय महिला क्रिकेट टोलीका प्रशिक्षक विनोद दासले यस्ता प्रतियोगिताले महिला खेलाडीले ठूलो फड्को मार्न सक्ने विश्वास व्यक्त गरे ।
राष्ट्रिय क्रिकेट टोलीका कप्तान पारस खड्काले महिलाका लागि यो ठूलो अवसर भएको उल्लेख गरे भने महिला टोलीका कप्तान रुविना क्षेत्रीले लिगका लागि उत्साहित भएको प्रतिक्रिया दिइन् ।
प्रतियोगिताको शहर, टोली र खेल तालिकासहित पुरस्कार रकम भने केही समयपछि सार्वजनिक गरिने लामाको भनाइ छ । यसअघि क्विन्स इभेन्ट म्यानेजमेन्टलले पोखरा प्रिमियर लिग (पिपिएल) सफलतापूर्वक आयोजना गरिसकेको छ ।
