काठमाडौं । नेपाल आयल निगमले अर्काे निर्णय नहुन्जेलसम्म पेट्रोलियम पदार्थको मूल्य यथावत राख्ने भएको छ । निगमले सोमबार विज्ञप्ति जारी गर्दै अन्तर्राष्ट्रिय बजारमा मूल्य बढिरहे पनि अर्को निर्णय नहुन्जेलसम्म साविककै मूल्यमा पेट्रोलियम पदार्थ बिक्री वितरण गर्न सबैमा आग्रह गरेको हो ।
स्वचालित मूल्य प्रणालीअनुसार हरेक १५ दिनमा इन्धनको मूल्य समायोजन गर्दै आएको नेपाल आयल निगमले यसपटक भने मूल्य यथावत राखेको छ ।
निगमले ०७१ असोजदेखि हरेक १५ दिनमा पेट्रोलियम पदार्थको मूल्य समायोजन गर्दै आएको छ । तर इन्डियन कर्पोरेसनले पठाएको पछिल्लो मूल्य अनुसार थपघट गर्नुपर्ने हिसाब नआएकाले साविककै डिपो तथा खुद्रा बिक्री मूल्यलाई निरन्तरता दिने निगमको सूचनामा उल्लेख छ ।
निगमका अनुसार अहिले पेट्रोलमा प्रतिलिटर १.७६ नाफा र डिजेलमा ०.६८ रुपैयाँ घाटा व्यहोर्दै आएको छ । एलपी ग्यासमा पनि निगमलाई झण्डै २३३.९० घाटा छ । पेट्रोल, मट्टीतेल र हवाई इन्धनको नाफा मिलान गर्दा अझै पनि पाक्षिक घाटा ३ करोड ६२ लाख हुने निगमको भनाइ छ ।
प्रकाशित मिति: सोमबार, असार १८, २०७५
-1732776560.jpg)
