चितवन । आन्तरिक राजश्व कार्यालय भरतपुरले मूल्य अभिवृद्धि कर (भ्याट) को सूक्ष्म अध्ययन थालेको छ । करको दायरामा नआउने र आएर पनि कम बिल काट्ने गरेको पाइएपछि कार्यालयले अध्ययन थालेको हो ।
मूल्य अभिवृद्धि करबाट उठ्नु पर्ने राजश्व सन्तोषजनक नदेखिएपछि अनुगमनलाई तीव्र बनाएर अध्ययन थालिएको कार्यालयका प्रमुख थानप्रसाद पंगेनीले बताउनुभयो । कार्यालयले चैत मसान्तसम्ममा मूल्य अभिवृद्धि करतर्फ ८९ करोड ३६ लाख ८९ हजार राजश्व संकलन गर्ने लक्ष्य राखेकामा ८० करोड एक लाख ८५ हजारमात्रै संकलन भएको छ । पंगेनीले मूल्य अभिवृद्धि बिल नकाट्ने, कम काट्ने र कुनै पनि किसिमको करको दायरामा नआउने समेत भेटिएपछि तीव्र अनुगमन गरिएको बताउनुभयो । अनुगमनका क्रममा भ्याट बिल नकाटेको पाइएमा नियमानुसार कारवाही गरिने उहाले बताउनुुभयो ।
कार्यालयका कर्मचारीहरुले सुराक सञ्जाल समेत प्रयोग गरेर अनुगमन गरिरहेका छन् । कतिपय कम्पनी तथा प्रतिष्ठानमा आशंका देखिएकामा पूर्ण लेखा परीक्षण गरी कर कायम गर्ने काम पनि कार्यालयले बढाएको बताउनु भइको छ ।
कार्यालयका कर अधिकृत डिल्लीराम पौडेलका अनुसार मूल्य अभिवृद्धि कर लाग्ने वस्तुको हकमा १२ महिनामा ५० लाखसम्म कारोवार हुदा दर्ता हुन नपर्ने व्यवस्था छ । साथै मूल्य अभिवृद्धि लाग्ने वस्तु तथा सेवा मिश्रित कारोवार र सेवाको हकमा रु २० लाखसम्मको कारोवार हुनेले दर्ता गर्नु नपर्ने व्यवस्था भएको उहाले जनकारी दिनु भयो ।
एक पटकमा १० हजार भन्दा बढीको मूल्य अभिवृद्धि कर लाग्ने वस्तु पैठारी गर्दा पनि दर्ता गर्नुपर्ने व्यवस्था रहेको अधिकृत पौडेलले बताउनु ुभयो । कार्यालयले चालू आर्थिक वर्षको चैत मसान्तसम्म १४ अर्ब ४५ करोड ६७ लाख राजश्व संकलन गरेको छ ।
जुन लक्ष्यको १०७ प्रतिशत हुन आउछ । यस आवमा कार्यालयले १९ अर्ब ७४ करोड राजश्व संकलन गर्ने लक्ष्य राखेको छ । गतवर्ष १६ अर्ब ८८ करोड २० लाख राजश्व संकलन गरेको थियो । कार्यालयले चितवन र नवलपुुर जिल्ला हेर्दै आएको छ । यस क्षेत्रमा मदिराजन्य उद्योग बढी भएकाले सबैभन्दा बढी राजश्व अन्तःशुल्कबाट उठ्ने गरेको कार्यालयका प्रमुख पंगेनीले बताउनुभयो । हाल कार्यालयको मातहतमा करीब ८० हजार करदाता छन् ।
प्रकाशित मिति: सोमबार, वैशाख २४, २०७५
-1732776560.jpg)
