चितवन । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रदेशको केही मन्त्रालय, राष्ट्रपति चुरे संरक्षणको केन्द्रीय कार्यालय र प्रदेश प्रहरीको हेडक्वाटर चितवनमा राख्ने निर्णय भएको खुलासा गर्नुभएको छ ।
बुधबार प्रेस सेन्टर चितवनले भरतपुरमा आयोजना गरेको विकास र समृद्धि बारेको अन्तरक्रियामा बोल्दै प्रचण्डले चितवन देशको केन्द्र भागमा रहनुको साथै प्रशस्त संभावना भएकोले चितवनमा केन्द्रीय तथा प्रदेश कार्यालयहरु रहने बताउनुभयो ।
‘राष्ट्रपति चुरे संरक्षण भनेको एउटा ठूलो परियोजना हो, त्यसको केन्द्रीय कार्यालय भरतपुरमा राख्ने समझदारी भईसकेको छ, प्रदेश प्रहरी हेडक्वाटर पनि चितवनमा राख्ने निर्णय भईसकेकाले चितवनमा विकासको लहर आउने छ,’ अध्यक्ष प्रचण्डले भन्नुभयो ।
अध्यक्ष प्रचण्डले चितवनमा लगानि गर्नका लागि अहिले देशका उद्योगी र विदेशी लगानीकर्ताहरु इच्छुक रहेको भन्दै चितवनमा विकासको गति अघि बढि सकेको बताउनुभयो । ‘अहिले चीन पनि चितवनमा लगानी गर्न इच्छुक छ, मसंगको कुराकानीमा करिव २५ वटा उद्योग चितवनमै खोल्ने प्रतिवद्धता जनाएका छन्,’ अध्यक्ष प्रचण्डले भने।
उहाँले चितवनलाई केन्द्र बनाएर वृहत्त रुपमा विकास गर्नुपर्ने बताउनुभयो । चितवनको विकासले देशव्यापी प्रभाव पार्ने भएका कारण नया मोडालिटीका आधारमा विकासको योजना ल्याउन लागिएको उहाँको भनाई थियो।
नवलपुर, मकवानपुर, धादिङ र भारतलाई समेत समेटेर विकासको मोडेल तयार गर्नुपर्ने उहाँले बताउनुभयो ।
‘एकीकृत रुपमा विकासको मास्टर प्लान बनाउनुपर्ने र यसका लागि छिमेकी जिल्लासंग पनि छलफल भईरहेको छ,’ उहाँले भन्नुभयो । बजेट तयारी, ऐन कानुन निर्माण र अध्यादेश टुंंग्याउने तयारीमा सरकार र पार्टी लागेको भन्दै नयँ बजेट मार्फत जनताका सबै माग सम्बोधन हुने उहाँले दावी गर्नुभयो ।
निर्वाचनमा स्थायीत्व र विकासको नाराका कारण नै वामगठबन्धनले बहुमत प्राप्त गरेकोले नयाँ सरकारको ध्यान त्यसैमा केन्द्रीत बनेको प्रचण्डको भनाई छ । उहाँले सिंगो राष्ट्र विकासको अभियानमा जुटेको भन्दै कृषि र पर्यटन मार्फत देशलाई समृद्ध बनाउने बताउनुभयो ।
चितवन विकासका लागि नमुना उदाहरण हुन सक्ने प्रचण्डले भन्नुभयो यहांँ प्राकृतिक स्रोत साधन र भौगोलिक विविधता छ, निकुञ्ज, नारायणी, राप्ती, रिउ संभावनाका उदाहरण हुन, यीनलाई प्रयोग गरी समृद्धि हासिल गर्न सकिन्छ, यसका लागि चुनौती पनि छन् ।
अध्यक्ष प्रचण्डले आफू प्रत्येक पटक चितवन आउदा कुनै न कुनै ठाउं जाने गरेको भन्दै रिल्याक्स गर्न नभई विकासको योजना बनाउने कुरामा केन्द्रीत बनेको बताउनुभयो । प्रचण्डले नयँ बजेट अघि नै हुलाकी राजमार्ग, शारदानगर चनौली सडक र विभिन्न दश भित्री सडकहरुमा चालु बजेटबाट रकम निकासा गरिएको बताउनुभयो ।
प्रकाशित मिति: मंगलबार, वैशाख ११, २०७५
-1732776560.jpg)
