काठमाडौँ । पाकिस्तानी प्रधानमन्त्री शाहीद खाकन अब्बासीले नेपाल बसाइका क्रममा चीनले अगाडि सारेको बीआरआईमा साझेदारीको विषयमा समेत चर्चा गरेर फर्किए ।
मंगलबार पाकिस्तानी प्रधानमन्त्री अब्बासीले पूर्वप्रधानमन्त्री एवं माओवादी केन्द्रका अध्यक्ष पुष्पकमल दाहालसँगको भेटमा बीआरआईबाट सशक्त रूपमा फाइदा लिन सुझाव दिएका छन् ।
उनले नेपाल र पाकिस्तानबीचको सम्बन्धको कडी सार्कसँग बीआरआई पनि थपिएको संकेत गर्दै दुवै देशले आर्थिक समृद्धि र विकास चीनले अगाडि सारेको बीआरआईबाट अगाडि बढ्न सक्ने आंैल्याएको दाहालको सचिवालयले जनाएको छ । माओवादी केन्द्रका अध्यक्ष दाहाल प्रधानमन्त्री हुँदा नेपालले २९ वैशाखमा बीआरआई फ्रेमवर्क समझदारीपत्रमा हस्ताक्षर गरेको थियो ।
मंगलबार बिहान पाकिस्तानी प्रधानमन्त्री अब्बासीलाई भेट्न माओवादी केन्द्रका अध्यक्ष दाहाल पार्टीका वरिष्ठ नेता नारायणकाजी श्रेष्ठ, गृहमन्त्री रामबहादुर थापा ‘बादल’, पार्टी नेता कृष्णबहादुर महरासहित होटल हायात रिजेन्सी पुगेका थिए ।
भेटमा दुई नेताहरूबीच बीआरआईको प्रक्रियालाई अगाडि बढाउँदै सो परियोजनाअन्तर्गत दुई देशबीचको आर्थिक सम्बन्ध थप बलियो बनाउने विषयमा छलफल भएको बताइएको छ ।
‘दुवै देश बीआरआईको सदस्य भएको नाताले यसबाट कसरी फाइदा लिने भन्ने विषयमा छलफल भयो,’ बैठकमा सहभागी माओवादी केन्द्रका वरिष्ठ नेता श्रेष्ठले भने, ‘दुवै देशको आर्थिक सम्बन्ध बढाउन बीआरआईले पनि सहयोग पु¥याउने कुरामा हामीहरूबीच एकमत देखियो ।’
पाकिस्तान बीआरआईको सदस्य राष्ट्र हो । चीनले बीआरआई परियोजनाअन्तर्गत ६२ बिलियन अमेरिकी डलरमा चीन–पाकिस्तान इकोनोमिक कोरिडोर निर्माण गरिरहेको छ । त्यस्तै, चीनले १० बिलियन डलरबराबरको कराँची रेल प्रोजेक्ट, २६० मिलियन डलरको गोदार विमानस्थल निर्माण गरिरहेको छ ।
प्रधानमन्त्री अब्बासीले सो परियोजनाअन्तर्गत रहेर नेपाल र पाकिस्तानबीच आर्थिक साझेदार थप बढाउन सकिने विश्वास व्यक्त गरेर फर्किएका छन् ।
‘बीआरआईबाट नेपालले पनि लाभ लिनेगरी प्रक्रिया अघि बढाउनुर्ने पाकिस्तानी प्रधानमन्त्री अब्बासीको सुझाव थियो,’ श्रेष्ठले भने ।
पाकिस्तानसँग आर्थिक साझेदारी बढाउनका लागि पनि बेल्ट एन्ड रोड इनिसिएटिभ, रेलमार्ग र सडकमार्गबाट नेपाल जोडिनुपर्ने परराष्ट्र मामिलाका जानकार हिरण्यलाल श्रेष्ठ बताउँछन् । उनको यो भ्रमणले पनि यस अर्थमा पनि अर्थ राख्ने उनले बताए ।
प्रकाशित मिति: मंगलबार, फागुन २२, २०७४
-1732776560.jpg)
