काठमाडौँ । साझा यातायातले थप सुविधासम्पन्न बसहरूमार्फत सेवा विस्तार गर्ने भएको छ । साझाले थप २९ वटा अाधुनिक बस भित्राउन लागेको छ ।
उपत्यका र बाहिरका लागि समेत गरेर २९ वटा नयाँ बस ल्याउन लागिएको साझाका प्रमुख कार्यकारी अधिकृत महेन्द्रराज पाण्डेयले जानकारी दिए।
भित्रन लागेको नयाँ बसमध्ये एउटा अपाङ्गतामैत्री होचो बससमेत रहेको छ । अपाङ्तामैत्री बस र डिलक्स बस भित्रने क्रममा रहेको छ भने सिटी बसको टेण्डर प्रक्रिया सकिएको पाण्डेयले जानकारी दिए ।
बस उपत्यका आएपछि प्राविधिक जाँच गरेर यातायात व्यवस्था कार्यालयमा दर्ता हुन्छ र त्यसपछि नै रुट कता लिने भन्ने टुंगो लाग्ने उनले बताए ।
काठमाडौँ उपत्यकाबाहिर अहिले साझाका दुईवटा बस चल्दै आएका छन्। काठमाडौँ–बाग्लुङ रुटमा दुई बस गुडिरहेका छन्। डिलक्स बस यही रुटमा थप्ने वा अन्य जिल्लामा भन्ने निर्णय भइसकेको छैन।
नयाँ बनेका नगरपालिकाले समेत साझाको शेयर खरिद गर्न र आफ्नो ठाउँमा साझा बसको सेवाका लागि इच्छुक देखिएका छन्। काठमाडौँ उपत्यका र उपत्यकाबाहिर दुबैतिर साझाको माग रहेको पाण्डेयले जानकारी दिए।
काठमाडौँ उपत्यकामा ४४ र उपत्यकाबाहिर दुईवटा गरेर अहिले साझाका ४६ वटा बस सञ्चालनमा छन्। २९ वटा नयाँ बस थपिएपछि साझाका बसको संख्या ७५ पुग्ने छ।
प्रकाशित मिति: बुधबार, माघ १७, २०७४
-1732776560.jpg)
