काठमाडौं । ब्राजिलका स्टार स्ट्राइकर नेयमार चिली र बोलिभियाविरुद्ध हुने विश्वकप छनोटका अन्तिम दुई खेलमा पनि अनुपस्थित हुने भएका छन्। सोमबार मुख्य प्रशिक्षक कार्लो एन्सेलोटीले घोषणा गरेको २३ सदस्यीय टोलीमा उनी अटाउन सकेनन्।
नेयमारलाई खुट्टाको मांसपेशी चोटका कारण टोलीबाहिर राखिएको हो। ब्राजिलले भने पहिल्यै २०२६ विश्वकपमा स्थान पक्का गरिसकेको छ। अक्टोबर २०२३ मा घुँडाको लिगामेन्ट च्यातिएपछि उनी राष्ट्रिय टोलीबाट टाढा रहेका छन्।
एन्सेलोटीले पत्रकार सम्मेलनमा भने, “नेयमारको क्षमताबारे कुनै शंका छैन। तर, अहिले हामीलाई उत्कृष्ट फिटनेसमा रहेका खेलाडी चाहिन्छ। उनी पूर्ण रूपमा तयार भएपछि मात्र टोलीलाई योगदान दिन सक्छन्।”
३३ वर्षीय नेयमार अहिले आफ्नो बाल्यकालको क्लब सान्तोसबाट खेलेका छन्। यो सिजन उनले १९ खेलमा ६ गोल गरेका छन्। तर, भर्खरै भास्कोविरुद्ध ६–० को हारमा मैदानमै आँसु झार्दै बाहिरिनुले उनको कठिन अवस्थालाई देखाउँछ।
यसपटकको टोलीमा एलिएसन, मार्क्विन्होस, कासेमिरोजस्ता अनुभवी खेलाडीसमेत छन्। त्यस्तै, चेल्सीका किशोर प्रतिभा एस्टेभाओ र लामो समयपछि फर्किएका वेस्ट ह्यामका लुकास पाक्वेटा पनि समावेश भएका छन्।
प्रकाशित मिति: मंगलबार, भदौ १०, २०८२
