काठमाडौं । सरकारले असार २३ र ३० गते बसेका मन्त्रिपरिषद बैठकका प्रमुख निर्णयहरू सार्वजनिक गरेको छ। बुधबार सञ्चार तथा सूचना प्रविधिमन्त्री तथा सरकारका प्रवक्ता पृथ्वीसुब्बा गुरुङले सिंहदरबारमा पत्रकार सम्मेलन गरी निर्णयहरूको जानकारी दिएका हुन्।
असार २३ गतेको बैठकले न्यूयोर्कमा हुने दिगो विकाससम्बन्धी उच्चस्तरीय बैठकमा राष्ट्रिय योजना आयोगका उपाध्यक्ष डा. शिवराज अधिकारीलाई सहभागी हुन स्वीकृति दिएको छ। त्यसैगरी गण्डकीका मुख्यमन्त्री सुरेन्द्रराज पाण्डेलाई चीन भ्रमण, एक हजार रुपैयाँ दरको नयाँ नोट छपाइका लागि डिजाइन स्वीकृति, र विद्यालय क्षेत्र सुधार कार्यक्रम अन्तर्गत विश्व बैंकको १०.८ मिलियन डलर अनुदान स्वीकृत गरिएको छ ।
सरकारले प्रत्येक साउन १६ गते “राष्ट्रिय कोदो दिवस” मनाउने निर्णय गरेको छ भने उखु किसानलाई प्रतिक्विन्टल ३५ रुपैयाँ अनुदान दिने पनि निर्णय भएको छ। साथै, नेपाली सेनामा ३७ महासेनानीको सरुवा, राष्ट्रिय वनको जग्गा जिपलाइन र स्काई साइकलिङका लागि प्रयोग गर्ने, र विज्ञान तथा प्रविधि सचिवलाई आणविक सम्मेलनमा चीन पठाउने स्वीकृति दिइएको छ। क्यासिनो नियमावली २०८२ र राष्ट्रिय जनसङ्ख्या नीति २०८२ पनि स्वीकृत भएका छन्।
असार ३० गतेको बैठकले जापान सरकारबाट नागढुंगा सुरुङमार्गका लागि ५ अर्ब ७० करोड येन बराबरको सहुलियतपूर्ण ऋण सहायता स्वीकार गरेको छ। बीमा प्राधिकरणका अध्यक्ष शरद ओझाको छानबिन गर्न पूर्वन्यायाधीश कृष्ण गिरीको संयोजकत्वमा समिति गठन गरिएको छ। फाप्ला क्रिकेट मैदानको कार्यावधि थपिएको छ भने डा. जयबहादुर टण्डनलाई इथियोपियामा हुने खाद्य प्रणाली सम्मेलनमा सहभागी हुन स्वीकृति दिइएको छ।
त्यसैगरी, सञ्चारमन्त्री गुरुङलाई "वर्ल्ड एआई कन्फरेन्स २०२५" (चीन) र स्वास्थ्य मन्त्री पौडेललाई "ग्लोबल हेल्थ फोरम" (बेइजिङ) मा सहभागी गराउने निर्णय भएको छ। अन्य निर्णयहरूमा सैनिक सरुवा तथा बढुवा, बहुउद्देश्यीय भवन निर्माणका लागि जग्गा स्वीकृति, ग्रामिण सडक स्तरोन्नतिको लागि वन क्षेत्र प्रयोग अनुमति, र स्थानीय तह केन्द्र स्थानान्तरणसम्बन्धी निर्णयहरू रहेका छन्
प्रकाशित मिति: बुधबार, साउन १, २०८२
-1752594743.JPG)
