काठमाडौं । नेपाल ट्रेड युनियन कांग्रेसको अध्यक्षमा योगेन्द्र कुँवर र महासचिवमा अजय राई निर्वाचित भएका छन् । कांग्रेस निकट कर्मचारीहरुको साझा संगठन ट्रेड युनियनको सातौं महाधिवेशनबाट कुँवर ४४१ र राई ४६४ मतका साथ निर्वाचित भएका हुन्।
पार्टीको नयाँ नेतृत्वका लागि बुधवार नेपाल प्रज्ञा प्रतिष्ठानमा मतदान भएको थियो। योगेन्द्र यसअघि महासचिव थिए। संस्थापन पक्षका उम्मेदवार कुवँरले प्रतिष्पर्धी महेन्द्र यादवलाई ६५ मतान्तरले पराजित गरेका हुन् । त्यस्तै राईका प्रतिष्पर्धी डीपी अर्यालले ३३७ मत पाए ।
वरिष्ठ उपाध्यक्षमा तेजेन्द्रजंग कार्की, खुला उपाध्यक्षमा गणेशबहादुर केसी, महिला उपाध्यक्षमा राधिका कुइँकेल खनाल, सेवा क्षेत्रतर्फको उपाध्यक्षमा नेत्रबिक्रम थापा, उत्पादन क्षेत्रतर्फको उपाध्यक्षमा ललितबहादुर श्रेष्ठ, अनौपचारिक तथा स्वरोजगार क्षेत्रको उपाध्यक्षमा राजेश पालिखे निर्वाचित भएका छन् ।
खुलातर्फको उपमहासचिवमा जनार्दन भट्टराई र बलदेव तामाङ, महिला उपमहासचिवमा सुशीला घिमिरे निर्वाचित भएका छन् । त्यस्तै सेवा क्षेत्रतर्फको उपमहासचिवमा देवदत्त बडु, उत्पादन क्षेत्रको उपमहासचिवमा कुलबहादुर खड्का, अनौपचारिक तथा स्वरोजगार क्षेत्रको उपमहासचिवमा रुकमणी थापा अर्चना निर्वाचित भएका छन् ।
कोषाध्यक्षमा सञ्जयकुमार दाहाल र सहकोषाध्यक्षमा रसामाया गुरुङ निर्वाचित भएका छन् । सदस्यतर्फको मत गणना भने जारी छ । ट्रेड युनियन कांग्रेसको केन्द्रीय समिति ४९ सदस्यीय हुने व्यवस्था छ।
प्रकाशित मिति: बिहीबार, असार ७, २०८०
-1732776560.jpg)
