३ साउन, रसुवा । रसुवाको मैलुङखोला जलविद्युत कम्पनीले शेयर बाँडफाँड स्थगित गरेको जनाएको छ । चिठ्ठा प्रणालीमा शेयर बाँडफाँड गरेको भन्दै रसुवाबासीले तिव्र विरोध गरेपछि शेयर बाँडफाँड स्थगित गरेको कम्पनीले जनाएको छ । जिल्लाबासीका लागि सुनिश्चत गरिएको १० प्रतिशत शेयर बाँडफाँडमा अनियमितता भएको भन्दै रसुवाबासीले आन्दोलन गर्ने चेतावनी दिँदै सोमबार प्रमुख जिल्ला अधिकारीको ध्यानाकर्षण गराएका थिए ।
रसुवाका स्थानीय समेत रहेका पत्रकार दीपक लामा, नेकपा एमालेका प्रचार विभाग प्रमुख पेम्वा तमाङ लगायतको अगुवाईमा प्रशासन मार्फत कम्पनीलाई सचेत गराइयो थियो । कम्पनीका जनरल म्यानेजर शरद बस्यालले सेयर बाँडफाँडको विषयमा धितोपत्र बोर्डसँग आवश्यक छलफल गरिरहेको र रसवाका सांसद जनर्दन ढकालसाग पनि छलफल गरिरहेको बताएका छन ।
यता सांसद ढकालले जिल्लाबासीले पाँउने १० प्रतिशत शेयर सुनिश्चत नभएसम्म सहमति हुन नसक्ने बताएका छन । ढकालले शेयर भरेका सम्पूर्ण रसुवाबासीले शेयर पाउने सुनिश्चत नभएसम्म बाँडफाँड स्थगित रहने बताए । कम्पनीले प्रभावित क्षेत्र र जिल्लाबासीलाई पाँच पाँच प्रतिशत शेयर वितरण गरेको तर माग भन्दा धेरैको निवेदन परेकाले गोलाप्रथाबाट शेयर बाँडफाँड गरिएको दाबी गरेको छ ।
प्रकाशित मिति: सोमबार, साउन २, २०७४
