३० असार, इलाम । प्रधानमन्त्री कृषि आधुनिकीकरण परियोजनाअन्तर्गत देउमाई नगरपालिकामा सञ्चालित अलैँची ब्लक कार्यक्रमलाई रु ४० लाख मूल्य बराबरको सामग्री हस्तान्तरण गरिएको छ । जिल्ला कृषि विकास कार्यालय इलाममा बुधबार आयोजित कार्यक्रममा देउमाई ब्लक सञ्चालक समितिका अध्यक्ष राम रानालाई एक पिकअप भ्यान र एक ट्याक्टरको साँचो स्थानीय विकास अधिकारी ध्रुवबहादुर खड्काले हस्तान्तरण गरे । परियोजनाअन्तर्गत ८५ प्रतिशत अनुदानमा पिकअप र ५० प्रतिशत अनुदानमा ट्याक्टर उपलब्ध गराइएको वरिष्ठ कृषि विकास अधिकृत राम सोगारथ शाहले जानकारी दिए । पिकअपको मूल्य रु २१ लाख र ट्याक्टरको १८ लाख परेको कार्यालयले जनाएको छ । अलैँची ब्लक कार्यक्रममा साना सिँचाइलाई रु पाँच लाख, नर्सरी निर्माणमा रु छ लाख, कस्टम हायरिङ सेन्टरलाई रु १५ लाख, पोष्ट हार्भेस्ट सेन्टर निर्माणमा रु २० लाख, माटो परीक्षण शिविरलाई रु ६० हजार र बीउ बेर्नाका लागि रु ६० हजार उपलव्ध भएको शाहले बताए । इलाममा परियोजनाअन्तर्गत सूर्योदय नगरपालिकाको आठघरेमा तरकारी ब्लक र देउमाई नगरमा अलैँची ब्लक सञ्चालनमा रहेका छन् । आठघरे तरकारी ब्लकमा यसअगाडि नै दुईवटा पिकअप भ्यान हस्तान्तरण गरिसकिएको छ । दुई हजार रोपनी क्षेत्रफलमा कुनै एक बालीलाई आधुनिकीकरण गरी यान्त्रीकरणतर्फ उन्मुख गराउनका लागि परियोजना सञ्चालन हुँदै आएको छ । यस्तै, जिल्लामा धान, मकै, अदुवा, तरकारी लगायतका क्षेत्रमा २५ वटा पकेट कार्यक्रम सञ्चालनमा रहेका छन् ।
प्रकाशित मिति: बिहीबार, असार २९, २०७४
