काठमाडाैं । नेपाल नागरिक उड्डयन प्राधिकरणलाई विभिन्न हवाई कम्पनी, तथा निजी र सरकारी संघ संस्थाले तिर्नुपर्ने बक्यौता २ अर्ब रुपैयाँ नाघेको तथ्यांक सार्वजनिक भएकाे छ । साउन मसान्तसम्म प्राधिकरणलाई विभिन्न कम्पनीले २ अर्ब १९ करोड ८८ लाख रुपैयाँ तिर्न बाँकी रहेको प्राधिकरणले जनाएको छ ।
प्राधिकरणले मातहतका विभिन्न निकाय, एयरलाइन्स, सरकारी कार्यालय, फर्म एवं व्यक्तिलाई बक्यौता रकम बुझाउन आग्रह गरेको छ । सरोकारवाला निकायले विभिन्न शीर्षकमा रकम भुक्तानी गर्न बाँकी रहेको देखिएको भन्दै प्राधिकरणले आज सूचना निकालेर ३० दिनभित्र उक्त रकम र नियमानुसार विलम्ब शुल्कसमेत बुझाउन आग्रह गरेको हो ।
प्राधिकरणलाई बक्यौता रकम बुझाउनुपर्ने १ सय ९५ कम्पनी, सरकारी कार्यालय, फर्म तथा व्यक्ति छन् । लामो समयदेखिको बक्यौता बुझाउन र विलम्ब शुल्क लाग्ने भए सोसमेत बुझाई आफ्नो हरहिसाब फरफारक गर्नु सूचनामा भनिएको छ ।
तोकिएको मितिभित्रमा पनि उक्त रकम प्राप्त नभएमा प्राधिकरण, विमानस्थल सेवा शुल्क नियमावली २०६७ तथा अन्य प्रचलित ऐन, कानूनअनुसार रकम असुल गर्नेतर्फ आवश्यक कारवाही अगाडि बढाउने चेतावनी दिएको छ ।
प्राधिकरणलाई बढी बक्यौता बुझाउन त्रिभुवन अन्तर्राष्ट्रिय विमानस्थलस्थित भन्सार कार्यालय, नेपाल एयरलाइन्स तथा निजी क्षेत्रका एयरलाइन्स कम्पनीहरु छन् ।
यही असोज २ गते प्राधिकरणको बजेट सार्वजनिक कार्यक्रममा प्राधिकरणका महानिर्देशक राजन पोखरेलले बक्यौता बुझाउन अटेर गर्ने कम्पनीलाई सार्वजनिक सूचना निकालेर ताकेता गरिने बताएका थिए ।
बक्यौतामध्ये सबैभन्दा बढी भन्सार विभागको ५४ करोड, एयर एसियाको २२ करोड रुपैयाँ छ । त्यस्तै, युनिभर्सल सप्लाई एजेन्सीको आठ करोड ७२ लाख, रसुवा केडीजेभीको पाँच करोड ६२ लाख, नेकोन एयरको चार करोड ७२ लाख, ग्रिनलाइन इन्टरनेसनलको एक करोड ७८ लाख, किङ फिसर एयरलाइन्सको १ करोड १५ लाख रुपैयाँ उठाउन बाँकी रहेकाे प्राधिकरणले जनाएकाे छ ।
प्रकाशित मिति: मंगलबार, असोज ७, २०७६
-1732776560.jpg)
