काठमाडौं : नयाँ आर्थिक वर्षको पहिलो दिनमै पुँजी बजारमा नयाँ रौनक आएको छ । बजेटपछि डेढ महिना लगातारजसो घटेको बजारमा नयाँ आर्थिक वर्षको पहिलो दिनले खुशीयाली भरेको हो । साउन १ देखि व्यक्तिगत लगानीकर्तालाई पुँजीगत लाभकरमा निकै सहुलियत भएको छ । यसअघि ७.५% रहेको पुँजीगत लाभकर बुधबारदेखि ५% मात्र तिरे पुग्नेछ । यसबाट पनि लगानीकर्ता निकै उत्साहित भएको विश्लेषण हुँदैछ ।
यसैगरी, लामो समयदेखि विवादमा रहेको सेयरको लाभकर गणना पनि वेटेड एभरेज विधिबाट गर्न थालिएको छ । यसबाट अन्योलता समाप्त भएको छ । यी दुई कारणले पनि लगानीकर्तामा आत्मबल बढेको विश्वास गरिएको छ । अर्को महत्वपूर्ण पक्ष लगानी योग्य रकम तरलता पनि हो । असार मसान्तको दबाबका कारण अधिकांश लगानीकर्ता थप सेयर किन्न सक्ने अवस्थामा थिएनन् । तर अब कर र साँवा–ब्याजको चटारो समाप्त भएको छ ।
बैंकहरुले नयाँ आर्थिक वर्षदेखि कर्जा प्रवाहमा पनि तीब्रता दिनेछन् । यसबाट लगानीकर्तालाई राहत मिल्नेछ । यसैगरी, गत आर्थिक वर्षमा भएका विकास निर्माणका कामको भुक्तानी अब धमाधम हुनेछ । यसबाट सरकारी खातामा रहेको रकम बैंकिङ प्रणालीमा आउनेछ । यसले पनि बजारमा सहज तरलता उपलब्ध हुने विश्लेषण गरिंदैछ ।
नयाँ आर्थिक वर्ष सुरु भएसँगै अब सूचीकृत कम्पनीहरुले धमाधम वित्तीय विवरण सार्वजनिक गर्न थाल्नेछन् । औसतमा कम्पनीहरुले नाफा वृद्धि गरेको तेस्रो त्रैमाससम्मको रिपोर्टबाट अनुमान लगाउन सकिन्छ । नाफा बढेमा यसले पनि लगानीकर्ता तान्नेछ । यसपछि फेरि कम्पनीहरुले लाभांश घोषणा गर्न थाल्नेछन् । यसको सकारात्मक प्रभाव पनि बजारमा पर्न सक्नेछ ।
नेप्से सूचक बिहीबार १५.८५ अंकले बढेर १२७४.८६ विन्दुमा आइपुगेको छ । समग्रमा बजार १.२६% ले माथि लागेको हो । १६७ कम्पनीको ४२ करोड ६७ लाख रुपैयाँभन्दा बढीको सेयर कारोबार भएको छ । १३ लाख ७५ हजार १९० कित्ता सेयर खरिदबिक्री भएका छन् ।
प्रकाशित मिति: बुधबार, साउन १, २०७६
-1732776560.jpg)
