काठमाडौं : खानेपानीमन्त्री बिना मगरले आगामी आर्थिक वर्षभित्रमा ९२ प्रतिशत जनसंख्यालाई आधारभूत रूपमा खानेपानी सेवा पुर्याउन सरकार प्रतिबद्ध रहेको बताएकी छिन् ।
उक्त सेवा पुर्याउनका लागि दातृ निकायको सहयोग पनि अपेक्षित रहेको उनको भनाइ छ । आगामी तीन वर्षभित्र शतप्रतिशत जनसंख्यालाई आधारभूत स्तरको खानेपानी सेवा पुर्याउन सरकारले लिएको लक्ष्यलाई सहयोग गर्न उनले विश्व बैंकका प्रतिनिधिलाई आग्रह गरिन् ।
बैंकका प्रतिनिधिमण्डलसँग शुक्रबार मन्त्रालयमा भएको भेटघाट तथा छलफलमा मन्त्री मगरले खानेपानीका नयाँ योजनामा थप सहयोग गर्न आग्रह गरिन् ।
भेटघाटमा मन्त्री मगरले भनिन्, ‘सन् २०३० सम्ममा सबै जनसंख्यालाई प्रशोधित स्वच्छ खानेपानीको पहुँच पुर्याउनुपर्ने चुनौती सरकारसँग छ । संघीय सरकारले प्रदेश र स्थानीय सरकारसँग समन्वय गरेर दिगो विकासका लक्ष्य हासिल गर्ने दिशामा अघि बढ्नुपर्ने जरुरी छ । यसका लागि देशैभरी हामीले खानेपानी र सरसफाइको गुरुयोजना बनाउँदैछौं ।’
ग्रामीण भेगका जनताले अझै पनि घन्टांै लगाएर पानी लिन जानुपर्ने स्थिति रहेको भन्दै मन्त्री मगरले ती क्षेत्रमा खानेपानीको समस्या समाधान गर्न विश्व बैंकको थप महत्वपूर्ण सहयोग चाहिएको बताएका उनको सचिवालयले जनाएको छ ।
मन्त्रालय मातहत रहेको ग्रामीण खानेपानी तथा सरसफाइ कोष विकास समितिलाई अझ सशक्त बनाएर लैजान चाहेको मन्त्री मगरको धारणा छ ।
पहुँचको आधारमा योजना छनोट नगरी सबै क्षेत्रमा समान रूपले योजना छनोट गर्ने र कार्यान्वयनमा लैजाने तयारीमा मन्त्रालय रहेको मन्त्री मगरले जोड दिइन् ।
नेपालका लागि विश्व बैंकका देशीय प्रबन्धक फारिस हदाद जर्वोसले खानेपानीको क्षेत्रमा नेपाल सरकारले लिएको लक्ष्यलाई पूरा गर्न विश्व बैंक सधैँ सहयोग गर्न तयार रहेको बताए । स्थानीय, प्रदेश र केन्द्र सरकारबीच समन्वयका आधारमा आयोजना अगाडि बढाउनुपर्ने उनको भनाइ थियो ।
प्रकाशित मिति: शनिबार, जेठ २५, २०७६
-1732776560.jpg)
