विराटनगर : मुलुककै पुरानो संस्था मोरङ ब्यापार संघमा नयाँ नेतृत्व निर्वाचित भएको छ ।
शुक्रबार निक्कै रस्साकस्सीका बीचमा भएको निर्वाचनले १९ सदस्यलाई निर्वाचित गरेको छ । संस्थापन पक्षको बलियो पकड भएको ब्यापार संघमा असन्तुष्ट पक्षलाई नराम्रोसँग पराजित गर्दै प्रकाश मुन्दडाको टिमले जित हासिल गरेको हो ।
संघको बर्तमान वरिष्ठ उपाध्यक्ष प्रकाश मन्दुडासहित ३२ औ कार्यसमितिमका लागि महासचिव नविन रिजाल, अनिल सारडा, अनुपम राठी, अमित सारडा, दिपेश सुवेदी, पवन राठी, सुनिल टिवडेवाला र आशिष जाजू निर्वाचित भएका हुन । रिजाल बाणिज्य क्षेत्रबाट निर्वाचित भएका हुन भने अन्य उद्योग क्षेत्रबाट निर्वाचित भएका हुन् ।
त्यसैगरी बाणिज्य क्षेत्रबाट मनिष मारु, विकासकुमार बेगवानी, विनित संघानिया, अनिल कुमार साह, देवासिष गोल्छा, राजेशकुमार अग्रवाल र सुशिल सुराना निर्वाचित भएका छन् । बस्तुगत समूहबाट सन्तनु रेग्मी र संजयकुमार श्रेष्ठ तथा शाखाबाट नवराज चापागाई यसअघि नै र्निबिरोध चयन भईसकेका थिए ।
सदस्यहरुबाटै पदाधिकारी चयन गर्ने प्रावधान अनुसार अहिले बरिष्ठ उपाध्यक्ष प्रकाश मुन्दडा अध्यक्ष हुने पक्का भएको छ । नवनिर्वाचित कार्यसमितिका सदस्य बिकास वेगवानीले आजको न्यूजसँग भने, ‘हामी सबैको चाहना भनेको नै प्रकाशजीको नेतृत्वमा संघलाई अघि बढाउने हो भन्ने हो । वहाँ कै नेतृत्वमा हामी अघि बढ्छौ । बाँकी पदाधिकारीको बिषयमा भने बैठक बसेर टुंगो लगाउँछौ ।’
कमजोर बन्यो असन्तुष्ट समूह
ब्यापार संघको इतिहासमा बिरलै रुपमा असन्तुष्टि र विरोधको आवाज उठेपनि ३१ र ३२ औ कार्यसमिति चयनमा भने ब्यवसायी दुई धारमा बिभाजन भए ।
३० औ कार्यसमितिमा बरिष्ठ उपाध्यक्ष रहेका राजेन्द्र राउतले ३१ औ कार्यसमितिमा अध्यक्षको दावेदारी प्रस्तुत गरेपछि संघमा संस्थापन र असन्तुष्ट समूहको दुईवटा खेमा नै बन्यो । तत्कालिन अध्यक्ष पवन सारडाले दुई कार्यकाल अध्यक्ष बन्दा ओझेलमा परेको राउत समूह ३१ औ कार्यसमिति चयनको निर्वाचनमा नराम्रोसँग पराजित बन्न पुग्यो ।
सोही कारण बिभाजित भएका ब्यापारीबीच संघको ३२ औ कार्यसमिति चयनका लागि निर्वाचन नै गर्नुपर्यो । अघिल्लो कार्यकालमा पराजित भएर असन्तुष्ट भएका समूहले धिरज पोखरेल, सुकुमार सेन, मेघराज सिग्देल र अरबिन्दकुमार शर्माले उम्मेदवारी दर्ता गराएको थियो । उनीहरुले राउत समूहको प्रतिनिधित्व गर्दै उम्मेदवारी दर्ता गराएका थिए ।
शुक्रबार भएको निर्वाचनमा पनि संस्थापन पक्ष र असन्तुष्ट पक्षबीचको खटपट सतहमा आएको थियो । निर्वाचन तालिका भन्दा केही ढिलो गरि भएको मतदान प्रक्रिया प्रजातान्त्रिक नभएको भन्दै राउत समूहका उम्मेदारले निर्वाचन नै बहिष्कारको घोषणा गरेका थिए ।
तर संस्थापन पक्षले भने उनीहरुले आफुहरुको जीत निश्चित देखेपछि निर्वाचनबाट डराएर भागेको प्रतिक्रिया दिए ।
प्रकाशित मिति: शनिबार, जेठ २५, २०७६
-1732776560.jpg)
