काठमाडौं : विश्व बैंकले यो वर्ष (२०१९) मा नेपालको आर्थिक वृद्धिदर ७.१ प्रतिशत हुने प्रक्षेपण गरेको छ। सेवा र कृषि क्षेत्रमा भएको वृद्धिले उक्त आर्थिक वृद्धि हासिल गर्न मुख्य योगदान पुर्याउने विश्व बैंकको भनाइ छ।
विश्व बैंकद्वारा बिहीबार सार्वजनिक ‘नेपाल डेभलप्मेन्ट अपडेट’ अनुसार यो वर्ष सेवा क्षेत्रमा ७.५ प्रतिशतको वृद्धि हासिल बताइएको हो ।
उक्त वृद्धिमा खुद्रा, होटल र रेस्टुरेन्टजस्ता क्षेत्रमा बढेको लगानी, पर्यटकको उच्च आगमन र रेमिट्यान्सकेन्द्रित खपतले योगदान पुर्याउने बताइएको छ।
त्यसैगरी कृषि क्षेत्रको वृद्धि पाँच प्रतिशत हुने विश्व बैंकको अनुमान छ। यो ३० वर्षयता हुँदै आएको औसत ३.१ प्रतिशतभन्दा माथि हो। यो वर्ष राम्रो मनसुन, व्यावसायीकरण, मल र बीउको उपलब्धता तथा सुधारिएको सिँचाइका कारण कृषिमा उक्त वृद्धि सम्भव बनाएको प्रतिवेदनमा उल्लेख छ।
त्यस्तै उद्योग क्षेत्रमा ३० वर्षयताकै उच्च ८.१ प्रतिशतको वृद्धि हासिल हुने प्रक्षेपण गरिएको छ। उद्योग क्षेत्रमा ३० वर्षयताको औसत वृद्धि पाँच प्रतिशत थियो।
प्रकाशित मिति: बिहीबार, जेठ २३, २०७६
-1732776560.jpg)
