काठमाडौं : साना उद्योगहरुको सीप, प्रविधि तथा स्थानीय उत्पादनलाई प्राथमिकता दिने उद्देश्यका साथ घरेलु तथा साना उद्योग महासंघको आयोजनामा हरेक वर्ष गरिँदै आएको लघु, घरेलु तथा साना औद्योगिक प्रदर्शनीको ३०औं संस्करण बुधबार राजधानीमा सुरु भएको छ ।
स्थानीय उत्पादनलाई प्राथमिकता दिइने ३०औं लघु, घरेलु तथा साना औद्योगिक प्रदर्शनी–२०७६ ले बजारीकरणमा सहयोग गर्नुका साथै प्रविधिकाबारेमा जानकारी दिन सहयोग गर्ने आयोजकले जनाएको छ ।
मेलाको उद्घाटन गर्नेक्रममा अर्थमन्त्री डा. युवराज खतिवडाले साना तथा घरेलु उद्योगको क्षमता अभिवृद्धि गरी प्रतिस्पर्धात्मक क्षमताको विकास गरी आत्मनिर्भरताका लागि सरकार प्रयत्नशील रहेको बताए । स्वदेशी उत्पादन स्वदेशमा नै खपत हुनेगरी बाध्यकारी नियम ल्याइने पनि उनको भनाइ छ ।
स्थानीय वस्तुको प्रयोगलाई बढावा दिइ स्थानीय उद्योगहरुको क्षमता अभिवृद्धि गर्ने उद्देश्यका साथ मेला गरिँदै आएको र धेरैहदसम्म उपलब्धिमूलक हुँदै आएको महासंघका उपाध्यक्ष सूर्यबहादुर कँडेलले बताए ।
स्थानीय उत्पादकहरुको क्षमता विकास तथा प्रविधिकरण र बजारीकरणमा सरकारको सहयोग आवश्यक रहेकामा उनले जोड दिए ।
पाँच दिनसम्म चल्ने मेलामा २०० ओटा स्टलहरु राखिएका छन् । ७७ ओटै जिल्लाका स्थानीय उत्पादनहरुलाई प्रदर्शनीमा समावेश गरिएको जनाइएको छ । मेलामा पाँच करोड रुपैयाँ बढीको कारोबार हुने आयोजकको अपेक्षा छ ।
प्रकाशित मिति: बिहीबार, जेठ २३, २०७६
-1732776560.jpg)
