२४ चैत, मोरङ । उपप्रधानमन्त्री एवम् अर्थमन्त्री कृष्णबहादुर महराले मुलुकमा आर्थिक समृद्धि ल्याउन सरकार प्रतिबद्ध रहेको बताए । मोरङ व्यापार सङ्घको ६२औँ साधारणसभाको बिहीबार उद्घाटन गर्दै उनले अर्थतन्त्रमा सुधार ल्याउनका लागि पुरानो मानसिकतालाई भत्काउनुपर्ने आवश्यकता औँल्याए । राज्यप्रति उत्तरदायी भएर राष्ट्रिय अर्थतन्त्रको विकासका लागि नयाँ नीतिका साथ निजी क्षेत्रलाई प्रोत्साहन गर्नुपर्नेमा जोड दिए । मुलुक नयाँ बजेटको तयारीमा जुटेको प्रसङ्ग उल्लेख गर्दै अर्थमन्त्री महराले भने “आगामी बजेटमा भन्सार, अन्तःशुल्कका साथै विभिन्न विषयमा परम्पराभन्दा भिन्न किसिम हुनेछ ।” विगत वर्षको तुलनामा यस वर्ष पुँजीगत खर्च बढेको जानकारी गराउँदै उनले चैत मसान्तसम्म खर्च नगरे बजेट जफत हुने स्पष्ट गरे ।
प्रकाशित मिति: बुधबार, चैत २३, २०७३
