काठमाडौं : सरकारले आर्थिक वर्ष २०७६/७७ का लागि ल्याएको बजेट हालसम्मकै राम्रो भन्दै शेयर लगानीकर्ताले खुसी व्यक्त गरेका छन् ।
सरकारले बजेटमार्फत पुँजीगत लाभकर साढे ७ प्रतिशतबाट घटाएर ५ प्रतिशतमा झारेपछि शेयर लगानीकर्ताहरूले हर्षित हुँदै बजेटको स्वागत गरेका हुन् ।
नेपाल इन्भेस्टर्स फोरमका अध्यक्ष छोटेलाल रौनियारले यसपटकको बजेटले शेयर लगानीकर्ताका लागि स्वागतयोग्य भएको बताए ।
लगानीकर्ताले लामो समयदेखि गर्दै आएको आन्दोलनका माग यस बजेटले सम्बोधन गरेको र यो पुँजीबजारका लागि कोशेढुंगा साबित भएको रौनियारले बताए ।
शेयर लगानीकर्ता संघ नेपालका अध्यक्ष उत्तम अर्यालले नेपालको इतिहासमा सबैभन्दा राम्रो बजेट प्रस्तुत गरेकामा अर्थमन्त्री र सरकारलाई धन्यवाद दिए ।
अर्यालले भने, नीतिगतरुपमा सबै कुरा राम्रो आएको छ र अब कार्यन्यनको पाटोमा पनि सरकार खरो रुपमा उत्रिनुपर्छ ।
यसपटकको बजेटले लगानीकर्तालाई उत्साहित बनाएको भन्दै लगानीकर्ता नवराज उप्रेतीले शेयर बजारको क्षेत्रका लागि हालसम्मकै उत्कृष्ट बजेट आएको जनाए ।
उनले भने, बजेटले शेयर बजारमा ढुक्कसँग लगानी गर्ने अवस्था सिर्जना गरेको छ । बजेट हालसम्मकै सबैभन्दा राम्रो छ ।
कुन कुन बुँदामा खुसी भए लगानीकर्ताः
विभिन्न ऐनहरुमा भएका कर छुट र सुविधा सम्बन्धी व्यवस्थाहरुसँग तादाम्यता हुनेगरी राजस्व सम्बन्धी कानूनहरुमा संशोधन गरिनेछ।शेयर कारोबारको पूँजीगत लाभकरको गणना भारित औसत लागत विधिबाट गर्ने व्यवस्था मिलाई शेयर लगानीकर्ताहरुलाई प्रोत्साहित गर्न हाल प्राकृतिक व्यक्तिलाई लाग्दै आएको करको दर ५ प्रतिशत कायम गरेको छु।
बैंकिङ्ग तथा वित्तीय वा बीमा व्यवसायको मर्जरमा कर छुट तथा सुविधाको प्रयोजनका लागि आयकर ऐन‚ २०५८ मा तोकिएको अवधि एक वर्षका लागि थप गरेको छु।दुर्घटना तथा स्वास्थ्य बीमामा मूल्य अभिवृद्धि कर नलाग्ने व्यवस्था गरेको छु।
प्रकाशित मिति: बिहीबार, जेठ १६, २०७६
-1732776560.jpg)
